Skip to the text
Ember
PT

Psalmus: 135

Confitemini Domino quoniam bonus, quoniam in æternum misericordia ejus.

Confitemini Deo deorum, quoniam in æternum misericordia ejus.

Confitemini Domino dominorum, quoniam in æternum misericordia ejus.

Qui facit mirabilia magna solus, quoniam in æternum misericordia ejus.

Qui fecit cœlos in intellectu, quoniam in æternum misericordia ejus.

Qui firmavit terram super aquas, quoniam in æternum misericordia ejus.1

Qui fecit luminaria magna, quoniam in æternum misericordia ejus.

Solem in potestatem diei, quoniam in æternum misericordia ejus.

Lunam et stellas in potestatem noctis, quoniam in æternum misericordia ejus.

Ant. Beato et soli potenti, Regi regum et Domino dominantium, qui solus habet immortalitatem, et lucem habitat inaccessibilem, honor et imperium sempiternum.2

Factum est autem, Jesu baptizato et orante, apertum est cœlum, et descendit Spiritus Sanctus corporali specie sicut columba in ipsum;3 et vox de cœlo facta est: Tu es Filius meus dilectus, in quo mihi complacui.4

B. Deo gratias.

B. Gratias agimus tibi, Domine Deus omnipotens, qui es, et qui eras, † Qui accepisti virtutem tuam magnam et regnasti, alleluia.5678

†. Confiteantur tibi, Domine, omnia opera tua, et Sancti tui benedicant tibi. Qui accepisti.

†. Gloria Patri. Alleluia.

O qui perpetua mundum ratione gubernas, Terrarum cœlique sator;9 qui tempus ab ævo

Ire jubes, stabilisque manens, das cuncta moveri;10

Quem non externæ pepulerunt fingere causæ

Materiæ fluitantis opus, verum insita summi

Forma boni, livore carens:11 tu cuncta superno

Ducis ab exemplo, pulchrum pulcherrimus ipse

Mundum mente gerens, similique imagine formans.

Da, Deus, augustam menti conscendere sedem,

Da fontem lustrare boni, da luce reperta

In te conspicuos animi defigere visus,

Atque tuo splendore mica. Tu namque serenum,

Tu requies tranquilla piis; te cernere, finis.

Cœtus in excelsis te laudat cœlicus omnis,

Et mortalis homo, pariter quoque cuncta creata.

Qui stellas numeras, quarum tu nomina solus,

Signa, potestates, cursus, loca, tempora nosti.

Principium, vector, dux, semita, terminus idem.12

Gloria, laus et honor tibi sit, Rex trine, Creator. Amen.

†. Patris et Filii et Spiritus Sancti una est divinitas.

B. Æqualis gloria, coæterna majestas.

Ad Benedictus, Ant. Qui fecit stellas.

Benedictus Dominus Deus Israel, quia visitavit, et fecit redemptionem plebis suæ.

Ut sine timore, de manu inimicorum nostrorum liberati, serviamus illi.

In sanctitate et justitia coram ipso, omnibus diebus nostris.

Per viscera misericordiæ Dei nostri, in quibus visitavit nos, oriens ex alto.13

Illuminare his qui in tenebris et in umbra mortis sedent, ad dirigendos pedes nostros in viam pacis.1415

Ant. Qui fecit stellas, hic est Deus noster, et non æstimabitur alius ab illo. Hic adinvenit omnem viam disciplinæ, et dedit illam Jacob puero suo, et Israel dilecto sibi; et post hæc super terram visus est, et cum hominibus conversatus est.

Gratias agamus Domino Deo nostro. Dignum et justum est, nos tibi semper et ubique gratias agere, Domine sancte, Pater omnipotens, æterne Deus, qui cum unigenito Filio tuo et Spiritu Sancto unus es Deus, unus es Dominus: non in unius singularitate personæ, sed in unius trinitate substantiæ. Quod enim de tua gloria revelante te credimus, hoc de Filio tuo, hoc de Spiritu Sancto, sine differentia discretionis sentimus. Ut in confessione veræ sempiternæque Deitatis, et in Personis proprietas, et in essentia unitas, et in majestate adoretur æqualitas. Quam laudant Angeli atque Archangeli, Cherubim quoque ac Seraphim, qui non cessant clamare quotidie, una voce dicentes:16 Sanctus, Sanctus, Sanctus, Dominus Deus omnipotens; pleni sunt cœli et terra gloria tua.

✠.17 Domine, exaudi orationem meam.

R. Et clamor meus ad te veniat.

Oremus.

Trinitas incorporea, invisibilis, incomprehensibilis, incircumscriptibilis, superexaltata, æterna, quæ ad omnia procedens per lucis tuæ influxum, manes in te ipsa inaccessibilis atque immobilis, uniformiter atque fixe et æternaliter eodem modo te habens:18 animam nostram, quam ad similitudinem tuam plasmare dignata es, ab omni immunditia eripe, eamque reforma et tibi assimila, atque indesinenter eam in tua bonitate custodi. Cui honor, beatitudo, vita et regnum per sæcula infinita. Amen.

✠. Domine, exaudi, etc.

R. Et clamor meus, etc.

✠. Benedicamus Domino.

R. Deo gratias.

✠. Animæ omnium fidelium defunctorum per misericordiam tuam, o benignissima Trinitas, requiescant in pace.

R. Amen.

AD PRIMAM.

Adsit nobis, etc., ut supra.

✠. Cor mundum crea in me, Deus.

R. Et spiritum rectum innova in visceribus meis.19

✠. Deus, in adjutorium, etc.

R. Domine, ad adjuvandum, etc.

✠. Gloria Patri. Alleluia.

Hymnus.

Fontale lumen, Deus vivus, Vere unus, vere trinus, Te cuncta pavent, tibi parent, Quæ per gyrum cœli tenent.

Tu dulcedo infinita, Lux immensa, pura vita, Te solum decet latria, In te immensa lætitia.

Præsta menti gratiarum Dona sacra supernarum, Ut te amet et metuat, Tibique semper pareat.

Honor, virtus et potestas, Laus et hymnus ac majestas, Summo Patri atque Verbo Et quem spirant, uni Deo. Amen.

Ant. Deus.

Footnotes

  1. Ps. CXXXV, 1-9. ↩

  2. I Tim. vi, 15, 16. ↩

  3. Luc. iii, 21, 22. ↩

  4. Matth. iii, 17. ↩

  5. Ibid. 76, 75. ↩

  6. Luc. i, 65. ↩

  7. Canticum. ↩

  8. Apoc. xi, 17. ↩

  9. Boet. De Consolat. lib. iii, metr. 9. ↩

  10. Baruch 1. 25-36. ↩

  11. Laus Dei. ↩

  12. Capitulum. ↩

  13. Hymnus. ↩

  14. Ps. cvi, 10. ↩

  15. Luc. i, 78, 79. ↩

  16. Is. vi, 3. ↩

  17. Ps. ci, 2. ↩

  18. Gen. i, 27. ↩

  19. Ps. l, 12. ↩

Chapter 6 of 33