Metrum 5

Si quis Arcturi sidera nescit Propinqua summo cardine labi, Cur regat tardus plaustra Bootes, Mergatque seras æquore flammas, Quum nimis celeres explicet ortus; Legem stupebit ætheris alti. Palleant plenæ cornua lunæ, Infecta metis noctis opacæ, Quæque fulgenti texerat ore, Confusa Phœbe detegat astra; Commovet gentes publicus error,

Lassantque crebris pulsibus æra. Nemo miratur flamina Cauri Littus frementi tundere fluctu; Nec nivis duram frigore molem, Fervente Phœbi solvier æstu. Hic enim causas cernere promptum est; Illic latentes pectora turbant. Cuncta quæ rara provehit ætas Stupetque subitis mobile vulgus, Cedat inscitiæ nubilus error, Cessant profecto mira videri.