Tit. IX. De poenitentia in vaccae immolatione.

Apud Moysen dum in sacrificium vacca mactatur, offerri cum hyssopo et ligno cedrino et cocco bis tincto praecipitur (Num. XIX). Vaccam mactamus, cum carnem a lascivia suae voluptatis exstinguimus; cum hyssopo, ligno cedrino, et cocco bis tincto, quia cum maceratione carnis sacrificium fidei, spei et charitatis adolemus. Hyssopus interna nostra mundat, et Petrus dicit: Animas vestras castificantes in obedientia charitatis, in fraternitatis amore (I Petr. I). Lignum cedrinum nulla putredine deficit, quia spem coelestium terminus non consumit. Unde Petrus: Regeneravit nos in spem vivam (ibid.). Coccus rubeo colore flavescit, quia quem implet charitas etiam accendit. Unde Dominus: Ignem veni mittere in terram (Luc. XII). Is dicitur bis tinctus, ut coram Deo charitas dilectione Dei et proximi coloretur.