Lettre I. Au Baron d'Hermance

Protestations de respect et de dévouement .

Paris, 26 novembre 1585.

Monsieur,

Despuys vostre dernier voyage en ceste ville j'avais tousjours bien bonne dévotion de vous escrire, ce que toutefoys je n'avoys osé fayre. Mays m'ayant escript un de mes amis de l'honneur et faveur que vous aves faict a une mienne seur , je me suys persuadé que le treuveries bon de moy, auquel vous fistes tant d'acueil dernierement en ceste ville ; joinct aussi que ne pouvant encores (Dieu m'en face la grace pour l'advenir) fayre paroistre l'affection que j'ay de vous fayre humble service, j'ay volu (comme il s'accoustume) vous en donner souvenance par lettres. Et maintenant que je suys au milieu et meillieur age de mes estudes, si je puys cognoistre seulement par presumption que prenies en bonne part mes lettres, ce me sera comme un aultre corage pour poursuyvre mon entreprise en l'estude, laquelle j'oseroys bien me promettre (sans me flatter) reussira au bien que je desire, Dieu aydant, qui est de le bien pouvoir servir; puys apres, vous fayre service, a qui j'ay tant de debvoir et obligation.

J'auroys bien bonne volonté de vous escrire des nouvelles de pardeça, mays les nostres ne sont que de colleges, outre ce qu'elles sont si incertaynes (on a faict le prince de Condé mille foys mort) que pour ce seul respect il me semble que je suys asses excusé d'en escnre.

Atant je vous bayse bien humblement les mains, et prie Dieu, Monsieur, qu'il vous tienne en santé et tres heureuse vie, vous suppliant de vous resouvenir de moy comme de celluy qui est et sera a jamays

Vostre plus humble serviteur

FRANÇOIS DE SALES. Monsieur Deage vous bayse bien humblement les [mains]. De Paris, ce 26 novembre 1585.

A Monsieur

Monsieur le baron d'Armence

a la Chapelle.

Revu sur l'Autographe conservé à Genève, Archives de l'Etat. (fac-simile placé en tète de ce volume).