Lettre DCCLXIII. Au Duc de Savoie, Charles-Emmanuel 1er

Requête en faveur d'un prisonnier innocent.

Chambéry, 26 mars 1612.

Monseigneur,

Vostre Altesse est suppliee par le sieur Chapperon de luy vouloir donner la delivrance de là prison en laquelle il se treuve presentement. Et parce qu'en divers voyages qu'il a fait par deça je n'ay jamais reconneu en luy qu'un esprit franc, candide et vrayement chrestien, et que d'ailleurs plusieurs bons Religieux et gens de bien de cette ville m'ont conjuré de le secourir de ma tres humble intercession aupres de Vostre Altesse Serenissime, je la supplie en toute reverence qu'il luy playse accorder laditte delivrance, tant en consideration de l'innocence du pauvre prisonnier, que les Peres Capucins attestent n'avoir aucunement cooperé a la sortie du. P. Bonaventure , seul sujet apparent de son emprisonnement, qu'en faveur de ce saint tems de Caresme, auquel le divin Aigneau d'innocence a si bonteusement delivré nos ames coulpables de la perdition. Vostre Altesse fera sans doute une justice charitable en cela , pour laquelle Dieu accroistra les recompenses qu'il luy a preparees.

Je prie continuellement cette souveraine Bonté qu'il luy playse combler de ses graces vostre Altesse Serenissime, et suis inviolablement,

Monseigneur,

Vostre tres humble, tres obeissant et tres fidele

orateur et serviteur,

FRANÇs, E. de Geneve.

XXVI mars 1612, a Chamberi.

A Son Altesse Serenissime.

Revu sur l'Autographe conservé à Turin, Archives de l'Etat.