Laus Dei
Domine, Deus meus es tu, exaltabo te, et confitebor nomini tuo:1 quoniam factus es fortitudo pauperis, adjutor egeni. Ecce Deus noster iste; exspectavimus eum, et salvabit nos. Nomen tuum et memoriale tuum, Domine, in desiderio animæ meæ.2 Anima mea desideravit te in nocte, sed et spiritus meus in præcordiis meis; de mane vigilabo ad te. Quis mensus est pugillo aquas, et cœlos palmo ponderavit?3 Quis appendit tribus digitis molem terræ, et libravit in pondere montes, et colles in statera? Quis adjuvit spiritum Domini? aut quis consiliarius ejus fuit, et ostendit illi? Cum quo iniit consilium, et instruxit eum, et docuit eum semitam justitiæ, et erudivit eum scientia, et viam prudentiæ ostendit illi? Omnes gentes quasi non sint, sic sunt coram illo, et quasi nihilum et inane reputatæ sunt ei.4 Qui extendit velut nihilum cœlos, et expandit eos quasi tabernaculum ad inhabitandum.5 Deus sempiternus Dominus, qui creavit terminos terræ, non deficiet, neque laborabit, nec est investigatio sapientiæ ejus.6 Vere tu es Deus absconditus, Deus Israel.7 Ego Dominus, hoc est nomen meum; gloriam meam alteri non dabo.8 Non est similis mei;9 consilium meum stabit, et omnis voluntas mea fiet. Et nunc, Domine Deus, pater noster es tu;10 nos vero lutum, et opera manuum tuarum omnes nos.11 Ecce tu iratus es, et peccavimus; quasi pannus menstruatæ omnes justitiæ nostræ.12 Ne irascaris, Domine, nec ultra memineris iniquitatis nostræ.
†. Domine, exaudi, etc.
R. Et clamor meus, etc.
Oremus.
Trinitas superbona, naturaliter bona, et bonitas pura, supersapiens et bona ac imperscrutabilis sapientia, in qua est plena communio, superjucunda diffusio et insegregabilis unio, in qua se Pater Filio totum communicat, Pater quoque et Filius totam suam deitatem et lucem in Spiritum Sanctum confundunt: munificentiam tuæ bonitatis in nobis demonstra, luceque sapientiæ tuæ animam nostram ad te contemplandum dignanter irradia, confirma et erige. Cui honor, beatitudo, vita et regnum per sæcula infinita. Amen.
†. Domine, exaudi, etc.
R. Et clamor meus, etc.
†. Benedicamus Domino.
R. Deo gratias.
†. Animæ omnium fidelium, etc.
AD SEXTAM.
Adsit nobis, etc.
†. Cor mundum, etc.
R. Et spiritum rectum, etc.
†. Deus, in adjutorium, etc.
R. Domine, ad adjuvandum, etc.
†. Gloria Patri. Alleluia.
Hymnus.
O benedicta Trinitas, In qua æterna unio, Sempiterna fecunditas, Perfectaque communio, Tu ens incommutabile, Ens incircumscriptibile. Te nemo comprehendere Valet, nec digne colere. Nos purga, doce et inflamma, Ut vitemus mentis damna, Et in nobis reformetur Imago tua et salvetur. Gloria et honor Deo Usquequo altissimo, Deo Patri Filioque, Inclyto Paracleto : Cui honor et potestas Per æterna sæcula. Amen.
Ant. Gratia Domini.
Footnotes
Chapter 16 of 33