Prologus

EPITOME

TOTA sacræ Bibliæ scriptura distinguitur in duo Testamenta, vetus videlicet et novum. Testamentum vetus dividitur in libros legales, historiales, sapientiales et prophetales. — Legales vocantur, in quibus leges judiciaque ore Dei edita promulgantur. Et sunt numero quinque, videlicet Genesis, Exodus, Leviticus, Numeri et Deuteronomium. Quibus respondet in novo Testamento Evangelium secundum Matthæum, Marcum, Lucam et Joannem : in quibus lex nova a Christo tradita continetur. — Historiales dicuntur, in quibus historiæ rerum gestarum narrantur. Et sunt numero septemdecim : Josue, Judicum, Ruth, Regum libri quatuor, Paralipomenon libri duo, Esdræ libri duo (nam Esdræ tertius et quartus apocryphi sunt, secundum Hieronymum), Tobiæ, Judith, Esther, Job, et Machabæorum libri duo. Quibus in novo Testamento respondet liber Actuum Apostolorum : in quo res per Christi Apostolos gestæ et decursus nascentis Ecclesiæ describuntur. — Sapientiales vocantur, in quibus vera prudentia et sapientia docetur. Et sunt quinque numero : Proverbia, Ecclesiastes, Cantica, Sapientia et Ecclesiasticus. Quibus in novo Testamento respondent Pauli apostoli epistolæ quatuordecim : ad Romanos una, ad Corinthios duæ, ad Galatas una, ad Ephesios una, ad Philippenses una, ad Colossenses una, ad Thessalonicenses duæ, ad Timotheum duæ, ad Titum una, ad Philemonem una, ad Hebræos una; Jacobi apostoli epistola una, Petri apostoli duæ, Joannis tres, et Judæ una : quæ septem posteriores canonicæ appellantur. — Prophetales nuncupantur, in quibus ventura prædicuntur, et sunt numero octodecim, puta : Psalterium, Isaias, Jeremias, Baruch, Ezechiel, Daniel, Osee, Joel, Amos, Abdias, Jonas, Michæas, Nahum, Habacuc, Sophonias, Aggæus, Zacharias, Malachias. Quibus in novo Testamento Apocalypsis Joannis apostoli respondet : in quo libro prædicuntur multa de Christo et Ecclesia, de reproborum et electorum statu futuro.

EPITOME

SIVE

NOBILIORES SENTENTIÆ TOTIUS BIBLIÆ