Tit. CXXVI. Quod multi sola curiositate veritatem quaerunt.

Pilatus interrogavit Jesum: Quid est veritas? (Joan. XVIII.) et statim egressus est in praetorium. Fecit ergo quaestionem, et non exspectavit responsionem. Sic multi transitorio fervore ad Deum conversi vera bona desiderare incipiunt; sed eadem mentis mutabilitate iterum ad transitoria effusi, in mentis proposito non persistunt. Quaerunt ergo conversi per desiderium veritatis, sed non exspectant responsionem aversi per appetitum vanitatis.