Tit. CX. De tribus nuptiis, et de variis verbis Dei.

Tres sunt species nuptiarum. Prima reconciliationis per fidem, in qua sunt tria fercula, peccatorum ablutio, gratiae consecutio, naturae reformatio; secunda adoptionis per spem, in qua sunt etiam tria: eloquii Divini consolatio, alimoniae coelestis communio, dulcedinis internae praelibatio. Tertia glorificationis perfectae per charitatem cujus haec tria fercula sunt: aeterna incorruptio, vera glorificatio, perpetua Dei visio. Verba consolationis Dei sunt ablutio culpae, restitutio gratiae, exilii evasio, consecutio regni, consortium Divinitatis, adeptio aeternitatis.