Lettre LXXI. À Monsieur d'Avully

Envoi d'un commentaire de saint Jérôme. - Joie d'apprendre la conversion de Mme de Rovorée.- Attente de l'arrivée du duc à Thonon.

Sales, 10 mai 1596,

Monsieur,

Je vous envoye le commentaire de saint Hierosme (In Eccles 9) tout au long, duquel ont estés tirees les paroles qui vous faysoyent difficulté . Il est clair et net, plein de doctrine catholique, puysque la parole de l'Apostre (Ga 6,8) demeure : Quœ seminaverit homo, hœc et metet. Et le secours que les ames qui sont en Purgatoire reçoyvent, n'est autre qu'une recompense de la communion de l'Eglise en laquelle les personnes chrestiennes meurent, communion par laquelle elles ont merité d'estr'aydëes par nos prieres. Et c'est la ou se rapporte la premiere partie du commentaire, quand il dict : " Mortui vero nihil valent adjicere; " c'est a dire, ilz ne peuvent plus acquerir de merites ni de justice, mais ilz peuvent bien percevoir le fruict de celle quilz ont eu en ce monde, et en vertu de la communion des Saintz, en laquelle ilz sont decedés, peuvent estr'aydés par les prieres, ausmones et satisfactions. Le dernier sens quil apporte du chien mort et lion vivant (Eccles 9,4) est mistique ou allegorique ; mays vous considereres mieux que moy tout cecy.

J'ay eu ceste bonne nouvelle que madame de Ravoyrëe et sa :fille de chambre avoyent abjuré l'heresie. Je ne sçai si elles auront este instruittes a plein fons, et partant je vous supplie, ou par lettre ou autrement, les consoler. Que si l'occasion se prœsentoit, je voudrois bien sçavoir s'il leur sera point demeuré de scrupule, car il est mal aysé a personnes qui ne sçavent pas poiser la fermeté de la vraye Eglise de demordre ainsi tout a coup. Or, Monsieur, c'est chose vostre, que je ne vous dois pas recommander si je ne vous estois tant serviteur que je suis.

Je languis en ceste si longu' attente de Son Altesse, laquelle ne venant pas ceste prochaine semayne, comme on prœtend, je retourneray a Thonon pour l'attendre. Ce pendant j'y envoye mon cosin . Monseigneur le Nonce m'escrit que Son Altesse est tres bien resolue pour le revenu des benefices et affectionnëe a ceste besoigne.

Je prie Dieu nostre Createur quil nous face vivr'et mourir pour son service, et vous supplie croire que je suys,

Monsieur, Vostre humble serviteur, FRANCOIS DE SALES.

A Sales, le 10 may 96, ou je bayse les mains de madame vostre compaigne et de toute vostre honorable brigade.

Revu sur l'Autographe conservé à la Visitation d'Annecy.