Lettre LXXX. Au Duc de Savoie, Charles-Emmanuel Ier

Opposition apportée par les syndics de Thonon à l'érection d'un autel. Combien la protection du duc est nécessaire aux nouveaux Catholiques. - Conversion d'un ministre protestant.

Thonon, 21 décembre 1596.

Monseigneur,

J'attens le bon playsir de Vostre Altesse pour le restablissement de la religion catholique en ce balliage de Thonon, et ce pendant je pensois dresser un autel en l'eglise Saint Hypolyte, en laquelle je preche ordinayrement des deux ans en ça, affin d'y pouvoir celebrer Messe ces bonnes festes de Noel. Les scindiques de ceste ville y ont apporté de l'opposition, a laquelle par apres ilz ont renoncé. Je ne puis sçavoir avec quel fondement ilz se sont osés produir'en cest affaire, puysqu'on ne violoit point le traitté de Nion ; et, quand on l'eust violé, ce n'estoit pas a eux d'y prouvoir. On ne forçoit personne, et ne faisoit on autre que se mettr'en la posture et au train auquel Vostre Altesse avoit laissé les Catholiques despuys ne fut elle icy, duquel ayant esté levés par force , on ne sçauroit dire pourquoy ilz ne puyssent s'y remettre toutes les fois qu'ilz en auront commodité, sous l'obeissance de Vostre Altesse.

Le zele que j'ay au service de Vostre Altesse me faict oser dire qu'il importe, et de beaucoup, que layssant icy la liberté qu'ilz appellent de conscience, selon le traitté de Nyon, elle prcefere neanmoins en tout les Catholiques et leur exercice ; et que partant elle se layss'entendre a ces gens quilz doivent simplement et seulement user de la permission quilz ont, sans se mesler d'empecher ceux qui, par toute rayson et par l'exemple mesme de leur souverain Prince, taschent d'avancer la foy catholique. Je ne pense point qu'il y ait aucune rayson qui puisse retarder l'affection sainte de Vostre Altesse en la sollicitation de [ce] grand bien, ni qui la rend'autre qu'aymable et admirable a ses plus endurcis ennemis.

M.de Lambert veut user de liberalité a l'endroit d'un ministre qui se convertit et qui par sa sollicitation en tirera beaucoup avant quil se descouvre ; je crois que Vostre Altesse l'aura agreable et luy commandera quil en face encores davantage . Je supplie donq Vostre Altesse commander comm'il luy plaira sur ce sujet, et. priant Dieu tres affectionnement pour sa santé, je m'honnoreray du bien que j'ay d'estr'advoué,

Monseigneur,

De Vostre Altesse,

Tres humble sujet et serviteur,

FRANÇOIS DE SALES,

Praevost de S' Pierre de Geneve.

A Thonon, jour S' Thomas, 96.

Revu sur l'Autographe conservé à Turin, Archives de l'Etat.