Lettre CXVI. À Monsieur Amédée de Chevron Seigneur de Villette
(INÉDITE)
Prière de se rendre en Chablais pour protéger les habitants si les troupes espagnoles traversent la province. - Recommander au duc les intérêts de la mission et l'engager à assister aux Quarante-Heures de Thonon.
Thonon, 23 août 1598.
Monsieur,
Ceste infinité de peyne que vous aves pour l'affaire de Dieu vous sera recompensee par Celuy pour lhonneur duquel vous le faittes. Ces gens de Thonon desirent quil vous plaise leur faire ce bien qu'au cas que le seigneur Dom Joan veullie passer icy resolument, il vous plaise d'assister a son passage, estimans que vostre praesence adoucira l'aigreur quilz en pourroyent sentir. Leur religion ne merite pas ceste faveur ; mais qui sçait si Dieu se veut servir de vostre courtoisie pour les faire penser a leur conscience? Ilz promettent bien quilz n'en seront pas ingratz. Si donq cela ne vous incommode pas beaucoup, je vous supplie tres humblement de le faire. Nous solliciterons vivement l'exacteur pour la partie quil vous doit , comme pour celuy auquel nous avons de si grosses obligations.
Mais pour Dieu, escrivant a Son Altesse, touchés vivement un mot affin quil vienne a ces 40 [heures]. Sil nous baille moyen de loger honnestement des curés par tout ce balliage apres les 40 heures, tout est emporté pour la foy catholique. Il ne se fera jamais plus a propos, et sans offencer personne, car cela viendra au desir de presque tous. Il ne coste rien a Son Altesse, car ces benefices de ce pais ne peuvent avoir moindre emploite que de demeurer aux Chevalliers de Saint Lazare ; il sera bien employé qu'on les reduyse a leur premier usage en une si belle occasion. Sa Sainteté approuvera tout indubitablement.
Je pensais partir passé demain, aller vers vous et a Sales ; mais j'attendray jusques a mercredi, par ce que le P. Cherubin me vient de dire qu'a son advis il ne serait que bon que vous donnies un coup d'esperon jusques icy pour voir tant plus briefvement ouverture a vostre payement. Que Son Altesse ne perde pas cest'occasion de reduire ses peuples en unité de foy ; Nostre Seigneur mesprise ceux qui mesprisent le jour de sa visitation (Is 10,3 ; Lc 19,41).
Quand au bruit qui a couru que les Bernois avoyent des trouppes de reitres dela le lac, c'est une bride a veau : est spaventa velliacho. Ilz ont bien fait leurs monstres de la milice ordinaire, que je metz en mesme conte que les monstres du papegai de Neci .
Or sus, Monsieur, je prie Dieu pour vostre santé, et suis irrevocablement
Vostre tres humble et tres asseuré serviteur et neveu,
FRANçs DE SALES.
Thonon, 23 aoust 98. Je salue monsieur et madame de la Faverge, mes oncle et tante .
A Monsieur
Monsieur de Vilette,
Maistre d'hoste! de S. A.
Revu sur l'Autographe conservé à Gênes, Sanctuaire de la Madonnetta.
Chapter 117 of 121