Lettre MCXXX. À Monseigneur Pierre Fenouillet Évêque de Montpellier

(INEDITE)

Saint François de Sales se porte garant du repentir d'un coupable. - Souvenirs du séjour de Mgr de Marquemont à Annecy. - Genève décimée par la peste.

Annecy, 8 novembre 1615.

Monseigneur,

Voyla qu'en fin le sieur de Barraux , repentant des il y a long tems, et corrigé de sa faute par le loysir et les raysons qui luy ont bien fait sentir le devoir quil a de vivre sage et sous-mis a vostre obeissance, il s'en va se jetter sous vostre protection, hors de laquelle il connoist bien quil ne peut bonnement durer. Or il a desiré un passeport et sauf-conduit de moy aupres de vous, par ce que le bonhomme son beaupere luy a dit que vous m'avies confié l'asseurance que vous pouves prendre de son amendement : qui m'a aussi fait entendre que je pouvois seul donner ouverture a son restablissement en vostre service. C'est pourquoy, le voyant remis au bon chemin, et d'ailleurs fort en peine pour le sujet quil vous dira, tres volontier je vous supplie, Monseigneur, de le recevoir, esperant que des-ormais vous n'en aures que du contentement, ainsy quil m'a solemnellement promis et protesté. J'ay les papiers de l'evesché quil avoit tres mal a propos apportés, et les garderay pour en faire ainsy que vous me commanderés.

Monseigneur l'Archevesque de Lion m'a fait lhonneur de me visiter et demeurer six ou sept jours ceans , pendant lesquelz il a fait deux sermons et une petite exhortation avec tant de pieté, que ce bon peuple en sera longuement consolé. Nostre Geneve est tous-jours extremement affligee de contagion ( note 166 ), mays ell' endurcit sous le chastiment. On asseure que jusques a present il est mort bien six mille personnes de ce mal, lequel par miracle ne s'est comme point espanché sur la Savoye.

Nostre paix est fort entiere maintenant, graces a Dieu, que je supplie la nous vouloir conserver, et vous combler de toutes les faveurs celestes quil depart a ses plus grans serviteurs, tandis que sans fin je suis et seray inviolablement,

Monseigneur,

Vostre tres humble et tres obeissant

frere et serviteur,

FRANÇs, E. de Geneve.

VIII IXbre 1615, Annessi.

A Monseigneur

Monseigneur le Rever. Evesque de Monpelier.

Revu sur l'Autographe appartenant à Mme Lamothe-Tenet, à Montpellier.