Lettre MCMXCIV. À une Demoiselle

Imperfection du désir de la mort. - Espérance sur une trépassée. - La parole de saint François d'Assise.

Il faut bien vrayement, ma chere Fille, qu'avec un peu de loysir vous taschies de soulager ce cœur paternel, comme une fille nourrie en l'eschole de Jesus Christ doit faire. Je ne veux pas, ma chere Fille, que vous desiries nullement la mort, car: vous n'estes plus vostre, ains a Celuy qui, pour vous avoir faite sienne, s'est rendu tout vostre ; et partant il ne vous appartient pas de desirer ni de sortir de ce monde, ni d'y demeurer, ains vous deves laisser ce soin au Seigneur.

Au reste, cette mere tesmoigna tant la presence de la grace de Dieu en son trespas, que nous devons tenir qu'elle est presente, ou du moins asseuree d'estre bien tost presente a sa gloire eternelle. Que si, selon la fragilité de cette vie, elle a besoin de suffrages, ma chere Fille, elle n'en manquera pas, Dieu aydant.

A mesure que Dieu tire nos plus chers a soy, il veut attirer nostre cœur, et, comme disoit saint François : A qui n'a point de pere en terre, il est plus aysé de dire : Nostre Pere, qui estes aux cieux ( Mt 6,9 ) . Et [a] qui n'a point de mere en terre, il est plus aysé [de dire] a la Bonté divine : Nostre dame, nostre mere qui estes au Ciel. En somme, ma chere Fille, releves le plus que vous pouves vostre cœur en Dieu, et il vous consolera.

Je suis en luy, tout parfaitement tout vostre.