Skip to the text
Ember
PT

Articulus 2

ELUCIDATIO CAPITULI SECUNDI : ET ITERUM INTRAVIT CAPHARNAUM POST DIES OCTO.

Et iterum intravit Jesus Capharnaum post dies octo; [et auditum est quod in domo esset;] et convenerunt multi, ita ut non caperet, hoc est, contineri et capi seu stare non possent, neque ad januam domus in qua exstitit Christus. Sed aliqui ipsam domum introierunt. Et loquebatur eis verbum vitæ æternæ.

Consequenter describitur curatio paralytici. De qua plenius dictum est in evangelio S. Matthæi : idcirco nunc celerius pertransibo. Et venerunt viri aliqui ferentes ad eum, hoc est ad Jesum, paralyticum qui a quatuor portabatur una cum lecto in quo jacuit. Et quum non possent offerre, id est præsentare eum paralyticum illi, scilicet Christo, præ turba : quoniam propter turbam non poterant per januam ingredi domum in qua docuit Christus; nudaverunt tectum ubi erat, id est, tectum domus illius ascenderunt, et facta illic apertura, per tegulas deposuerunt lectum cum languido. Unde nunc subditur : et patefacientes, id est, tectum illud aperientes, submiserunt grabatum in quo paralyticus jacebat. Tecta enim in locis illis plana fuerunt, habueruntque januam qua ad ea ascendebatur : per quam aliqui dicunt lectum fuisse submissum cum paralytico isto. Quia tamen hic dicitur quod nudaverunt tectum, et Lucas quoque ait quod per tegulas submiserunt infirmum, magis apparet quod in ipso tecto novam fecerunt aperturam.1

Cetera quæ hic de isto miraculo recitantur, patent ex his quæ in Matthæo dicta sunt.2 Hic tamen dicitur, quod Jesus cognovit spiritu suo cogitationes Scribarum. Et potest per spiritum Christi intelligi Spiritus Sanctus, de quo ait Apostolus :3 Si quis Spiritum Christi non habet, hic non est ejus.4 Cujus utique Spiritus virtute et gratia, Christus ut homo agnovit cogitationes universorum. Et potest quoque per spiritum Christi intelligi intellectus animæ ejus, quo omnia præterita, præsentia et futura cognoscit.

Et egressus est rursus ad mare quod currit per Galilæam. Judæi autem quamlibet magnam congregationem aquarum nominant mare : quem loquendi modum servaverunt Evangelistæ. Et quum præteriret loca illa, vidit Levi Alphæi, id est Matthæum filium Alphæi : Matthæus enim alio nomine dictus est Levi; sedentem ad telonium. Porro, quæ subjunguntur hoc loco de vocatione Matthæi et punctis annexis, dicta atque exposita sunt in Matthæo.56 — Deinceps Marcus describit disceptationem discipulorum Joannis et Pharisæorum cum7

Jesu; et littera patet plenissime ex his quæ in Matthæo dicta sunt.8

Et factum est iterum quum sabbatis ambularet Jesus per sata.9 Hic Evangelista commemorat quomodo Jesu ambulante per agros seminatos et blada portantes, discipuli ejus fame compulsi, spicas sumpserunt et comederunt:10 quo viso Pharisæi increpabant Christum.11 Quidquid autem hic scribitur de hoc facto, supra expositum est in Matthæo. Sed quærendum est, quomodo Marcus dicat ipsum David intrasse domum Dei sub Abiathar principe sacerdotum, quum in libris Regum legatur id factum sub Achimelech pontifice? Et respondendum, quod iste Abiathar fuit filius Achimelech, succedens ei in sacerdotii principatu; et patre ejus vivente, egit interdum vices ipsius: ideo David dicitur introisse domum Dei sub eo.

Footnotes

  1. Luc. v, 19. ↩

  2. 5-12 ↩

  3. Rom. viii, 9. ↩

  4. Matth. ix, 2-7. ↩

  5. Matth. ix, 9-13. ↩

  6. 15-17 ↩

  7. 18-22 ↩

  8. Matth. IX, 14-17. ↩

  9. 23-28 ↩

  10. Matth. XII, 1-8. ↩

  11. 1 Reg. XXI, 1. ↩

Chapter 3 of 17