In nativitate Domini

HYMNUS

1. Venit Redemptor gentium, Ostendens partum Virginis. Miretur omne sæculum : Talis decet partus Deum.

2. Non ex virili semine, Sed mystico spiramine, Verbum Dei factum caro, Fructusque ventris floruit.

3. Alvus tumescit Virginis, Claustra pudoris permanent, Vexilla virtutum micant, Versatur in templo Deus.

4. Procedens e thalamo suo, Pudoris aula regia, Geminæ gigas substantiæ, Alacris ut currat viam.

5. Egressus ejus a Patre, Regressus ejus ad Patrem, Excursus usque ad inferos, Recursus ad sedem Dei.

6. Æqualis æterno Patri, Carnis trophæo accingere ; Infirma nostri corporis Virtute firmans perpeti.

7. Præsepe jam fulget tuum, Lumenque nox spirat novum : Quod nulla nox interpolet, Fideque jugi luceat.

8. Gloria tibi, Domine, Qui natus es de Virgine, Cum Patre et Sancto Spiritu, In sempiterna sæcula. Amen.