In die Pentecostes
AD VESPERAS HYMNUS
Veni, Creator Spiritus, Mentes tuorum visita, Imple superna gratia Quæ tu creasti pectora.
Qui Paracletus diceris, Donum Dei altissimi, Fons vivus, ignis, caritas, Et spiritalis unctio.
Tu septiformis gratia, Dextræ Dei tu digitus, Tu rite promissum Patris, Sermone ditans guttura.
Accende lumen sensibus, Infunde amorem cordibus,
Infirma nostri corporis Virtute firmans perpeti.
Hostem repellas longius, Pacemque dones protinus; Ductore sic te prævio, Vitemus omne noxium.
Per te sciamus da Patrem, Noscamus atque Filium, Te utriusque Spiritum Credamus omni tempore.
Sit laus Patri cum Filio, Sancto simul Paracleto; Nobisque mittat Filius Charisma Sancti Spiritus. Amen.
Chapter 11 of 32