Metrum 4

Quisquis composito serenus ævo Fatum sub pedibus dedit superbum, Fortunamque tuens utramque rectus, Invictum potuit tenere vultum :

Non illum rabies minæque ponti Versum funditus excitantis æstum, Nec ruptis quoties vagus caminis Torquet fumificos Vesevus ignes,

Aut celsas soliti ferire turres Ardentis via fulminis movebit. Quid tantum miseri feros tyrannos Mirantur sine viribus furentes? Nec speres aliquid, nec extimescas,

Exarmaveris impotentis iram; At quisquis trepidus pavet vel optat, Quod non sit stabilis suique juris, Abjecit clypeum, locoque motus, Nectit qua valeat trahi catenam.