Metrum 2

Si quantas rapidis flatibus incitus Pontus versat arenas, Aut quot stelliferis edita noctibus Cœlo sidera fulgent, Tantas fundat opes, nec retrahat manum Pleno copia cornu; Humanum miseras haud ideo genus Cesset flere querelas. Quamvis vota libens excipiat Deus Multi prodigus auri,

Et claris avidos ornet honoribus, Nil jam parta videntur, Sed quæsita vorans, sæva rapacitas Altos pandit hiatus. Quæ jam præcipitem frena cupidinem Certo fine retentent; Largis quum potius muneribus fluens, Sitis ardescit habendi? Nunquam dives agit, qui trepidus gemens, Sese credit egentem.