Metrum 6

Novimus quantas dederit ruinas, Urbe flammata patribusque cæsis, Fratre qui quondam ferus interempto, Matris effuso maduit cruore ; Corpus et visu gelidum pererrans, Ora non tinxit lacrimis, sed esse Censor exstincti potuit decoris. Hic tamen sceptro populos regebat

Quos videt condens radios sub undas Phœbus, extremo veniens ab ortu, Quos premunt septem gelidi Triones, Quos Notus sicco violentus æstu Torret, ardentes recoquens arenas. Celsa num tandem valuit potestas Vertere insani rabiem Neronis? Heu, gravem sortem, quoties iniquus Additur sævo gladius veneno !