Metrum 10

Huc omnes pariter venite capti, Quos fallax ligat improbis catenis Terrenas habitans (al. hebetans) libido mentes. Hic erit vobis requies laborum, Hic portus placida manens quiete, Hoc patens unum miseris asylum.

Non quidquid Tagus aureis arenis Donat, aut Hermus rutilante ripa, Aut Indus calido propinquus orbi, Candidis miscens virides lapillos, Illustrant aciem, magisque cæcos In suas condunt animos tenebras. Hoc quidquid placet excitatque mentes, Infimis tellus aluit cavernis. Splendor quo regitur vigetque cœlum, Vitat obscuras animæ ruinas. Hanc quisquis poterit notare lucem, Candidos Phœbi radios negabit.