Metrum 11

Quisquis profunda mente vestigat verum, Cupitque nullis inde deviis falli, In se revolvat intimi lucem visus, Longosque in orbem cogat inflectens motus, Animumque doceat, quidquid extra molitur, Suis retrusum possidere thesauris. Dudum quod atra texit erroris nubes, Lucebit ipso perspicacius Phœbo. Non omne namque mente depulit lumen, Obliviosam corpus invehens molem. Hæret profecto semen introrsum veri, Quod excitatur ventilante doctrina. Nam cur rogati, sponte recta censetis, Ni mersus alto viveret fomes corde? Quod si Platonis musa personat verum, Quod quisque discit, immemor recordatur.