Metrum 4

Quid tantos juvat excitare motus, Et propria fatum sollicitare manu ? Si mortem petitis, propinquat ipsa, Sponte sua, volucres nec remoratur equos.

Quos serpens, leo, tigris, ursus, aper (al. apri) Dente petunt, iidem se tamen ense petunt. An distant quia dissidentque mores, Injustas acies et fera bella movent, Alternisque volunt perire telis? Non est justa satis sævitiæ ratio. Vis aptam meritis vicem referre? Dilige jure bonos, et miseresce malis.