Metrum 7

Bella bis quinis operatus annis Ultor Atrides, Phrygiæ ruinis Fratris amissos thalamos piavit. Ille dum Graiæ dare vela classi Optat, et ventos redimit cruore, Exuit patrem, miserumque tristis Fœderat natæ jugulum sacerdos. Flevit amissos Ithacus sodales,

Quos ferus vasto recubans in antro, Mersit immani Polyphemus alvo; Sed tamen cæco furibundus ore, Gaudium mœstis lacrimis rependit. Herculem duri celebrant labores : Ille Centauros domuit superbos; Abstulit sævo spolium leoni; Fixit et certis volucres sagittis;

Poma cernenti rapuit draconi, Aureo læva (al. lævam) gravior metallo; Cerberum traxit triplici catena; Victor immitem posuisse fertur Pabulum sævis dominum quadrigis; Hydra combusto periit veneno; Fronte turpatus Achelous, amnis Ora demersit pudibunda ripis; Stravit Antæum Libycis arenis;

Cacus Evandri satiavit iras; Quosque pressurus foret altus orbis, Setiger spumis humeros notavit; Ultimus cœlum labor irreflexo Sustulit collo, pretiumque rursus Ultimi cœlum meruit laboris. Ite nunc fortes, ubi celsa magni Ducit exempli via. Cur inertes Terga nudatis? Superata tellus Sidera donat.