Distinctio 4

Hic oritur quæstio satis necessaria, etc.

ILLA quidem vera est et concedenda : Deus genuit Deum. Non autem illa : Deus genuit se Deum vel alium Deum. Ex ea enim sequeretur, idem generasse se ipsum, vel plures esse Deos : quod utrumque falsum est. Neque secunda sequitur ad primam, sed quod genuerit Filium, aut alium in persona. Illa ergo, Deus Pater genuit Deum qui non est Deus Pater, id est Filium qui non est Pater, qui Deus est : vera est, quum solam personalem significet alietatem. Si vero exponatur, Qui non est idem Deus cum Deo Patre : falsa est, quia in ea alietas essentiæ importatur. Tres igitur personæ sunt, una Deitas. Et unus Deus est, tres personæ. Et unus Deus, ipsa Trinitas. Et una substantia, tres personæ. Et econtra, Trinitas est unus Deus, et tres personæ dicuntur esse una essentia.

Quod Deus ipse Deū genuit, quod tres Deus unus Personæ, sanxit non temerata fides.