Distinctio 27

Post hæc advertendum, etc.

QUUM matrimonium sit viri et mulieris maritalis conjunctio, inter personas legitimas individuam retinens vitæ consuetudinem; ideo conjuges sine consensu mutuo non separantur, nec unus sine altero continentiam vovere potest, sed debitum ei reddere tenetur. Fit autem Matrimonium per consensum cordium dictarum personarum, per verba de præsenti expressum, etiam si copula carnalis non interveniat. Estque differentia inter sponsalia et matrimonium, quum sponsus etiam invita sponsa monasterium ingredi possit, et econtra; non autem conjuge cognita hoc potest, quamvis et sponsi conjuges quandoque dicantur. Quod si sponsalia cum vidua de futuro contrahantur, per hoc bigamia non inducitur; bene autem, si de præsenti, ut Magister dicit. Sed in ultimo non tenetur.

Præsentis verbo nubendum temporis, idque Durat quam conjux vivit uterque diu.