Lettre XLI. Au Père Antoine Possevin, de la Compagnie de Jésus

(MINUTE)

Assurance de respectueux attachement, - Le Saint parle de son ordination et de ses débuts dans le ministère.

[Entre le 8 et le 20 décembre 1594]

Monsieur [mon Reverend Pere],

Je fays tant d'estat de lhonneur que j'ay eu a Padoue d'estre receu en roole avec vos enfans spirituelz, que je penserais avoir faict une perte signalëe si j'estois rayé de ce nombre, Pour me nourrir en vostre memoyre [et] conserver ce bien pour moy, je vous ay voulu addresser ceste lettre comm'une humble requeste, pour vous supplier m'entretenir tousjours en la faveur laquelle une foys vous m'avies accordëe, n'ayant rien faict des lors qui m'en puysse priver, sinon que ce fut d'avoir tant attendu de vous escrire et salluer. En quoy, le peu d'asseurance que j'avoys du lieu ou vous esties et le respect que je dois a vos occupations me pourroit beaucoup excuser, puysque je n'ay pas layssé de demander a toutes occasions de vostre santé, tant quil y a quelques moys que j'en eus des nouvelles par le P. Jean Lorrini . Mays le seul souvenir de vostre bonté m'en promet un total pardon.

Et au reste, pour vous rendre quelque conte du vostre despuys que je suys de retour d'Italie, je me suys tellement faict ecclesiastique que j'ay celebré Messe le jour de saint Thomas l'Apostre dernier, en nostre eglise cathedrale de Saint Pierre de Geneve, ou je suys indigne Praevost, qui est la premiere dignité apres l'episcopale, et, par le commandement de mon Evesque, des demy annee en ça j'ay prcesché icy et ailleurs parmi le diocaese la parole de Dieu ; en quoy je m'accuseroys bien fort de temerité si l'obeissance ne m'en avoit osté le scrupule. C'est ce que j'ay faict et que je fays encores le mieux que je scay, vous portant bien souvent avec moy en imagination en chaire. Pleut a Dieu seulement que j'y portasse quelque mediocrité de vos perfections pour le service [de] sa divine Majesté, laquelle je prie continuer longuement en santé Vostre Paternité, a laquelle baysant les mains, je demeureray

tres humble filz et serviteur.

Revu sur l'Autographe appartenant à M. le Chanoine Collonges, aumônier de la Visitation de Chambéry