Lettre LXXXIII. Au Duc de Savoie, Charles-Emmanuel Ier

(MINUTE INÉDITE)

Erection d'un autel dans l'église Saint-Hippolyte. - Recommandation en faveur du ministre Petit. - Combien il importe que les Chevaliers de Saint-Lazare cèdent les revenus ecclésiastiques qu'ils détiennent en Chablais.

Thonon, vers le 21 février 1597.

Monseigneur,

J'ay receu un'incroyable consolation quand j'a y veu par celle qu'il a pleu a Vostre Altesse signer le 7 janvier , qu'elle trouvoit bon que l'on aye dressé un autel en l'eglise Saint Hypolyte de Thonon. Pour vray, l'evenement a monstré qu'on n'a rien faict de trop ; et je puis dire a Vostre Altesse que je vay tant retenu en ceste besoigne que je ne crains point d'autre juste accusation que de trop de lascheté.

Monsieur de Lambert ayant receu advis que Vostre Altesse avoit agreable qu'il eust secouru le ministre qui se veut catholizer n'a pas osé tirer consequence de la pour la continuation de ce bienfaict, qui me faict supplier Vostre Altesse de la luy declairer. Le seigneur chevalier Bergere , connoissant bien que l'assignation des six pensions que l'on a faicte sur les revenus de la Religion de Saint Lazare ne peut pas joindre a l'œuvre de la reduction de ces peuples a la foy catholique, a trouvé raysonnable la proposition que je luy ay faicte que la Religion rendist absolument les cures a cest effect. Plaise a Vostre Altesse se resouvenir qu'elle la trouva desja juste quand j'eus cest honneur de la luy representer, et d'employer autant de son authorité qu'elle jugera necessaire pour reduire messieurs du Conseil de la Religion a ceste resolution.

Et louant Dieu de tout mon cœur du saint zele dont je voy devoré le cœur de Vostre Altesse, je me resjouis d'estre comme je suis,

Monseigneur,

De Vostre Altesse,

Tres humble et tres fidelle sujet et serviteur.

Revu sur le texte inséré dans le 1er Procès de Canonisation.