Lettre LXXXVIII. Au Duc de Savoie, Charles-Emmanuel Ier

Demande de secours pour des indigents. - Requête en faveur de quelques hameaux des Allinges. - Menées des protestants contre M. d'Avully.

Thonon, 12 mars 1597.

Monseigneur,

Dernierement, quand j'eu (sic) cest honneur de bayser les mains a Vostre Altesse, je luy reprœsentay six ou sept pauvres gens, vieux et impuyssans a gaigner leur vie, qui ont vescu icy avec une admirable constance en la foi catholique. Et parce que leur pauvreté pourroit estre secourue avec une petite piece des graines de Ripaille et Filly qui sont destinees aux aumosnes, je suppliay tres humblement Vostre Altesse, a leur nom, de leur en assigner quelque portion ; et selon la pieté dont Dieu l'a enrichie elle le trouva raysonnable. Maintenant je sçai que ces aumosnes se reduysent aux Alinges pour la munition de la garnison ; mays je ne laisseray pour cela d'oser supplier Vostre Altesse quil luy plais'ordonner que, d'une si grande quantité, quattre ou cinq muys en soyent appliqués a ces pauvres gens vieux et a un autre qui, estant encores de bon aage, ne laisse pas d'estre pauvre et, moyennant cest'aumosne, pourra servir au clocher pour les catholiques.

Il y a aussi certains petits vilages qui estoyent anciennement de la parroisse d'Alinges, et personne ne leur contredisoit d'en estre encores maintenant ; mays par ce que Vostre Altesse, selon son saint zele, a gratiffié la paroisse d'Alinges d'un'immunité de toutes charges pour quattre ans a venir, en contemplation de leur retour a l'Eglise, on a opposé a ces petitz vilages que du tems de l'occupation des Bernois on leur commanda d'aller ailleurs a la praeche. Je supplie donques tres humblement Vostre Altesse d'eslargir plus tost sa liberalité sur ces vilages par une declaration, que d'estressir ceste premiere parroisse qu'on a dressé en ce païs a la foy catholique.

Les gens du consistoire supreme de ce balliage taschent de lever a monsieur d'Avully la judicature qu'il y tient de Vostre Altesse ; mays puysque ce consistoire n'est que pour la correction des meurs et qu'il n'en est faitte aucune mention au traitté de Nion, a ce que j'ay peu apprendre, comm'on ne perd pas le jugement pour se faire catholique, aussy n'en devrait on pas perdre la judicature, specialement quand elle depend de la volonté de Vostre Altesse, pour la santé de laquelle je ne cesseray de prier Dieu nostre Seigneur, comm'ayant ce bien [de] me pouvoir et devoir dire,

Monseigneur,

De Vostre Altesse,

Tres fidelle et tres humble sujet et serviteur,

FRANÇOIS DE SALES,

indigne Prevost de S' Pierre de Geneve .

A Thonon, le 12 mars 97.

Revu sur l'Autographe conservé à Turin, Archives de l'Etat.