Lettre DCXCVI. À Monseigneur Pierre Fenouillet Évêque de Montpellier

Le rétablissement du culte à Gex et part qu'y a prise le Chapitre de Genève. - Sollicitation du placet royal pour lui annexer un bénéfice. - Petites nouvelles. - Retour à la foi d'un gentilhomme. - Pourquoi la connaissance de la vérité n'est pas toujours suivie de la conversion.

Annecy, 15 juin 1611.

Monseigneur,

Nostre Chapitre de Geneve a plus cooperé aux commencemens de l'establissement de l'exercice catholique a Gex qu'aucuns ecclesiastiques ; car, outre que monsieur le Prevost , messieurs Grandis , Bochuti et Gottri , chanoynes dudit Chapitre, ont esté les premiers qui ont fait residence a leurs despens en ce pais-là durant un'annee, ce fut ce Chapitre qui fournit aux fraitz que je fis, estant encor Prevost, pour la sollicitation de la confirmation de l'establissement . En consideration de cela, un certain seigneur de Monluel, qui par longues annees avoit possedé un petit benefice simple audit Gex, de la valeur d'environ 20 ou 25 escus de revenu, ayant de son gré et par son election desiré que ce sien benefice fut uni a nostre dit Chapitre, je l'ay fait encor plus volontier, comme chose sainte et juste .

Mays d'autant qu'a l'adventure, les cours laiques, en cas quil y eut quelque controverse ci apres, requerront que les proviseurs ayent le placet ou brevet du Roy, et que la valeur du benefice n'est pas si grande qu'on puisse envoyer expres pour en faire la supplication a Sa Majesté a laquelle mesme, en tous evenemens, nous n'aurions aussi pas moyen d'avoir bon acces que par vostre entremise, partant nous vous supplions tres humblement tous, que si ce n'est point vostre incommodité, il vous playse impetrer ledit placet. La petitesse de la piece, le travail passé de ceux de ce Chapitre, vostre credit, nous rendent un'esperance certaine que cela ne sera pas fort malaysé; car, bien que nostre Chapitre reside maintenant, par emprunt, de deça, si est ce que naturellement il est de Geneve. Et Messieurs de Saint Claude , estrangers non seulement au regard du royaume, mays encor au regard du diocœse, ont bien obtenu plusieurs placetz pour divers benefices de ce pais-la de Gex, ou ilz' n'ont rendu, que je sache, aucun service comparable a celuy que nos chanoynes ont fait.

Voyla, Monseigneur, ma requeste envers vous, et voyci mes petites nouvelles. Je fus l'autre jour a Gex, aupres de monsieur le Grand ( Le duc de Bellegarde.) et monsieur de Lux, ou j'eu.la consolation de retirer un gentilhomme et cappitayne de la religion a la foy catholique , de reconcilier deux eglises parrochiales , et, en quatre sermons, d'esbransler plusieurs hœretiques, et leur fayre advoüer que la verité catholique estoit belle , quoy que difficile a comprendre. Mais comme ce n'est pas tous-jours l'erreur de l'entendement, ains le defaut de la volonté et l'impureté des affections qui tient les hommes hors de l'Eglise, aussi n'y rentrent-ilz pas tous-jours quand ilz connoissent la verité d'icelle. .

A cette consolation, messieurs le Grand et de Lux en adjoustoyent presque ordinairement une autre, qui estoit de me parler de vous et de vos merites comme l'honneur amoureux que je vous porte me pouvoit faire desirer. A mon retour, je treuvay que mon voyage n'avoit pas esté seulement fertile en consolation, selon sa petitesse, mais aussi, de ce costé de deça et de dela les mons, de soupçons et calomnies ( lettre 695 ), que la verité neanmoins effacera, comme je pense, par la suite de quelques jours.

Il failloit dire ce mot de confiance avec vous, qui me donnés si abondamment le bonheur. de vostre amitié, que tout le monde s'en res-jouit avec moy, et particulierement ces seigneurs dont je viens de dire les noms. Continués, je vous supplie, Monseigneur, et croyés que je suis invariablement,

Vostre...

Revu en partie sur l'Autographe conservé à Issy (Paris), Maison de Philosophie de la Compagnie de Saint-Sulpice.