Lettre DCXCII. À la Même
Effusions de ferveur. - Fruit du mystère de la Pentecôte. - L'esprit de force et l'esprit de sagesse ; l'amour sacré et la souveraine Unité.
Annecy, [22 mai 1611 .]
……………………………………………………………………………………….
Ostetoy d'icy autour ,ô vent de bise, et viens, o vent de midy,
et souffle dans mon jardin, et les parfums en sortiront abondamment ( Ct 4, ult ). 0 ma tres chere Fille, que je souhaitte ce gracieux vent qui vient du midy de l'amour divin, ce Saint Esprit qui nous donne la grace d'aspirer a luy et de respirer pour luy.
Ah ! que je voudrois bien vous faire quelque don, ma chere Fille ; mays, outre que je suis si pauvre, il n'est pas convenable qu'au jour auquel le Saint Esprit fait ses presens, nous nous amusions a vouloir faire les nostres ; il ne faut entendre qu'a recevoir au jour de cette grande largesse. Mon Dieu, que j'en ay voyrement bien besoin de l'esprit de force ! car je suis, certes, foible et infirme, dequoy neanmoins je me glorifie, affin que la vertu de mon Seigneur habite en moy ( 2 Co 12,9 ). J'ayme mieux estre infirme que fort devant Dieu, car les infirmes, il les prend entre ses bras et les fortz il les mene par la main. La Sapience eternelle soit a jamais dans nostre cœur, affin que nous savourions les tresors de l'infinie douceur de Jesus Christ crucifié.
Dites a la grande fille ( Sœur Marie-Jacqueline Favre ), que, comme moy, elle se glorifie en sa foiblesse, qui est toute propre pour recevoir la force ; car, a qui donner la force qu'aux foibles ?
Bon soir, ma tres chere Fille. Ce feu sacré qui change tout en soy, veuille bien transmüer nostre cœur, affin qu'il ne soit plus qu'amour et qu'ainsy nous ne soyons plus aymans, mais amour ; non plus deux, mais un seul nous mesme, puisque l'amour unit toutes choses en la souveraine Unité. A Dieu, ma chere Fille ; perseverons au desir de cette unité, de laquelle Dieu nous ayant fait jouir des icy, autant que nostre condition infirme le peut porter, il nous en fera plus parfaitement jouissans au Ciel.
FRANÇs, E. de Geneve.
Chapter 38 of 217