Lettre MCLXXXVIII. À M. Claude-Amédée Vibod ( Note 309 )

Le Duc autorise François de Sales à prêcher à Grenoble. - Nouvelles explications au sujet des visites de prélats français à Annecy.

Annecy, 4 avril 1616.

Monsieur,

J'ay receu la lettre de Son Altesse, par laquelle elle tesmoigne d'aggreer que je face les sermons du Caresme venant a Grenoble , et ay veu par celle qu'il vous a pleu m'escrire, le soin que vous aves eü de lire ce que j'escrivois a sadite Altesse ( lettre 1142 ) sur le sujet de la venue de Monseigneur l'Archevesque de Lyon en cette ville ; dont je vous rens graces, Monsieur, d'autant plus affectionnement et humblement, que ces bons offices n'ont origine que de vostre bonté et courtoysie, laquelle je vous supplie de vouloir exercer en toutes telles occasions qui m'arrivent plus souvent que je ne desirerois pas, plusieurs Prœlatz de France me faysant l'honneur de m'aymer et de me vouloir visiter, encor qu'ilz ne me connoissent pas, ains peut estre par ce qu'ilz ne me connoissent pas.

Mays, Monsieur, ce sont visites de simple pieté et affection spirituelle, n'ayant, graces a Dieu, jamais rien eu a demesler avec homme du monde, ni ne m'estant jamais meslé de chose quelcomque qui regarde les affaires seculieres. Et en verité, onques il ne m'est advenu d'avoir esté seulement essayé par homme qui vive, ni qui ayt esté, de ce costé là; qui me rend d'autant plus estonné quand on me dit que les visites de ces seigneurs ecclesiastiques sont considerees comme suspectes, ne pouvant seulement deviner ni pourquoy ni en quoy, puisque mesme je suis en toutes façons savoyard, et de naissance et d'obligation, qui n'ay, ni n'eu jamais, ni pas un des miens, ni office, ni benefice, ni chose quelcomque hors de cet Estat, et qui ay vescu tellement lie aux exercices ecclesiastiques, qu'on ne m'a jamais treuve hors de ce train, et qui suis meshuy tantost envielly dans la naturelle et inviolable fidelite que j'ay voüee et juree a Son Altesse.

Or, Monsieur, je vous donne la peine de lire tout ceci, affin que sil vous plait de me favoriser en ces occurrences, vous sachies ces generalites de mes conditions, qui sont fondaments, comme je croy, bien solides pour bastir sur iceux les defenses dont j'auray besoin si ce malheur continue, qui m'a des-ja si souvent fasché, tous-jours sans ma coulpe, graces a Dieu, ainsy que le tems a fait voir, qui, de plus en plus, descouvrira l'invariable ingenuite et franchise que j'ay en mon devoir de sujettion naturelle envers la coronne sous laquelle je suis nay et nourri.

Ces jours passes Monseigneur l'Archevesque de Bourges, estant a Nantua , vint icy me visiter et une seur Religieuse quil y a ; dequoy j'advertis soudain monsieur le Marquis de Lans, et je croy qu'il aura fait passer l'advis vers Son Altesse. Tout cela, Monsieur, sont offices d'amitié, de civilite et de piete rendus a la bonne foy par ces Praelatz, et que je ne puis empescher par aucune sorte de legitime praetexte, puisque je n'oserois seulement penser de leur faire semblant de la peine que mon esprit a dequoy leur visite me fait regarder. Vostre charite, Monsieur, me protegera, sil luy plait, et je l'en conjure par celle de Nostre Seigneur, que je supplie vous estre propice et vous combler de ses benedictions, demeurant pour tous-jours,

Monsieur,

Vostre tres humble, tres affectionn6 serviteur,

FRANÇs, E. de Geneve.

IIII avril 1616, Annessi.

Revu sur l'Autographe conservé à Turin, Archives de l'Etat.