Lettre MCLXXV. À Madame de la Fléchere

La succession de M. de la Fléchère. - Au milieu des ennuis, s'attacher, esclave d'amour, au pied de la Croix.

Annecy, 1er mars 1616.

Ainsy que je pensois vous renvoyer vos papiers par mon laquay , ma tres chere Fille, ces deux cousins arriverent, qui en seront les porteurs. J'ay consulté vostre affaire, et ay treuvé que le conseil de monsieur vostre neveu est extremement bon et quil le faut suivre, sinon que vous fussies fort asseuree quil n'y eut es biens de feu monsieur vostre mari que ce quil faut pour vos droitz, auquel cas il seroit plus court de les retenir pour iceux droitz et ne point faire heriter les enfans. Mays puisque vous penses d'aller a Chamberi, vous resoudres tout cela bravement.

Vous y treuveres madame de Chasteaufort et Mme du Chatelard ; je vous prie de les bien saluer. Elles sont toutes deux fort affectionnees a nostre Visitation, et en seront, l'une par effect, comme je pense, estant libre , et l'autre d'affection, estant retenue par ses enfans .

Le bon M. de Guydeboys s'est fort lamenté d'estre demeuré despouillé, a ces deux cousins. Ne faites pas semblant que je vous en aye adverti, mays je seray bien ayse que vous justifiies vostre bonne intention pour luy, attendu quil est si proche de vostre feu mari.

Au reste, ma pauvre tres chere Fille, entre les ennuys que vostre imagination vous fournit, jettes souvent vostre cœur entre les bras du cher Espoux nouveau ; attachés vous comme un'esclave d'amour au pied de sa sainte Croix, et souvienne vous que bienheureux sont ceux qui n'ont rien, pourveu qu'ilz ayent ce grand Tout hors lequel tout n'est rien pour nous.

Si vous voules aller a Chamberi et y conduire le petit pour faire la reverence a M. le Marquis , peut [être] l'un de ces deux cousins fera bien l'office, ou avec vous ou sans vous, selon que vous aviseres.

Ma tres chere Fille, je suis infiniment tout vostre. Nous parlons souvent, nostre Mere ( SJC ) et moy, de vous ; ell'a un amour nompareil. Ce cousin va en intention de ne point voir M. le Comte ; je ne sçai si le sachant a moytié malade, cela luy fera point changer de dessein.

De rechef, je vous salue de tout mon cœur, ma tres chere Fille, que je souhaite toute sainte en Nostre Seigneur.

Le 1er mars 1616.

A Madame

Madame de la Flechere.

Revu sur une copie déclarée authentique, conservée à Turin, Archives de l'Etat.