Lettre MMXCVI. Pensée Consolante sur la Mort des Amis. - Apprendre Dès Ici-Bas le Cantique du Saint Amour. – " une Planche pour Passer a la Vie Celeste. " - Mourir à Soi-Même pour Vivre à Dieu

a)

(Dép. de la Sainte ad art 25,28) Voyes vous, les passages de nos chers amis, ilz sont certes tres aymables, puisqu'ilz se font pour peupler le Ciel et aggrandir la gloire de nostre Roy. Un jour que Dieu sçait, nous irons vers eux; et ce pendant,. apprenons soigneusement le cantique du saint amour, affin que plus parfaitement nous le chantions en cette sacree eternité.

b)

Oh ! que bienheureux sont ceux qui ne mettent point leur courage en une vie si trompeuse et incertaine comme est celle-ci, et n'en font conte que comme d'une planche pour passer a la vie celeste ! C'est en cela qu'il nous faut loger nos esperances et pretentions.

c)

(Dép .du P.Philibert de la Bonneville ad art 26) Mourons a nous mesmes et a tout ce qui depend de nous mesmes. Il m'est advis que nous ne devons plus vivre qu'a Dieu ; mon cœur, mon courage fait une nouvelle saillie pour cela, et luy semble qu'il sera vray.

Or sus, Nostre Seigneur est nostre Seigneur et tout nostre bien: qu'avons nous a faire d'autre chose ?