Metrum 5

O stelliferi Conditor orbis, Qui perpetuo nixus solio, Rapido cœlum turbine versas, Legemque pati sidera cogis : Ut nunc pleno lucida cornu, Totis fratris et obvia flammis, Condat stellas luna minores; Nunc obscuro pallida cornu, Phœbo propior lumina perdat; Et qui primæ tempore noctis Agit algentes Hesperus ortus, Solitas iterum mutet habenas, Phœbi pallens Lucifer ortu. Tu frondifluæ frigore brumæ Stringis lucem breviore mora; Tu, quum fervida venerit æstas, Agiles noctis dividis horas. Tua vis varium temperat annum : Ut quas Boreæ spiritus aufert, Revehat mitis Zephyrus frondes; Quæque Arcturus semina vidit, Sirius altas urat segetes. Nihil antiqua lege solutum Linquit propriæ stationis opus.

Omnia certo fine gubernans, Hominum solos respuis actus Merito, Rector, cohibere modo. Nam cur tantas lubrica versat Fortuna vices? Premit insontes Debita sceleri noxia pœna : At perversi resident celso Mores solio, sanctaque calcant Injusta vice colla nocentes; Latet obscuris condita virtus Clara tenebris, justusque tulit Crimen iniqui. Nil perjuria, nil nocet ipsis Fraus mendaci compta colore; Sed quum libuit viribus uti, Quos innumeri metuunt populi, Summos gaudent subdere reges. O jam miseras respice terras, Quisquis rerum fœdera nectis. Operis tanti pars non vilis Homines, quatimur fortunæ salo. Rapidos, Rector, comprime fluctus; Et quo cœlum regis immensum, Firma stabiles fœdere terras.