Metrum 6

Quum Phœbi radiis grave Cancri sidus inæstuat, Tum qui larga negantibus Sulcis semina credidit, Elusus Cereris fide, Quernas pergat ad arbores. Nunquam purpureum nemus

Lecturus violas petas, Quum sævis Aquilonibus Stridens campus inhorruit. Nec quæras avida manu Vernos stringere palmites, Uvis si libeat frui; Autumno potius sua

Bacchus munera contulit. Signat tempora propriis Aptans officiis Deus, Nec quas ipse coercuit,

Misceri patitur vices. Sic quod præcipiti via Certum deserit ordinem, Lætos non habet exitus.