Metrum 7

Nubibus atris Condita nullum Fundere possunt Sidera lumen.

Si mare volvens Turbidus Auster Misceat æstum, Vitrea dudum

Parque serenis Unda diebus, Mox resoluto Sordida cœno, Visibus obstat. Quique vagatur Montibus altis Defluus amnis, Sæpe resistit Rupe soluti Obice saxi. Tu quoque si vis

Lumine claro Cernere verum, Tramite recto Carpere callem; Gaudia pelle, Pelle timorem, Spemque fugato, Nec dolor adsit: Nubila mens est Vinctaque frenis, Hæc ubi regnant.