Metrum 8

Quod mundus stabili fide Concordes variat vices, Quod pugnantia semina Fœdus perpetuum tenent, Quod Phœbus roseum diem Curru provehit aureo; Ut quas duxerit Hesperus Phœbe noctibus imperet, Ut fluctus avidum mare Certo fine coerceat, Ne terris liceat vagis Latos tendere terminos: Hanc rerum seriem ligat, Terras ac pelagus regens Et cœlo imperitans amor.

Hic si frena remiserit, Quidquid nunc amat invicem, Bellum continuo geret; Et quam nunc socia fide Pulchris motibus incitant, Certant (al. certent) solvere machinam. Hic sancto populos quoque, Junctos fœdere continet; Hic et conjugii sacrum Castis nectit amoribus; Hic fidis etiam sua Dictat jura sodalibus. O felix hominum genus, Si vestros animos amor Quo cœlum regitur, regat!