Lettre CLXXXV. À M. Antoine de la Porte

( INÉDITE )

Dispositions bienveillantes du duc de Savoie envers Mme de Mercœur. Jugement d'un procès entre cette princesse et don Amédée de Savoie. - Le Saint s'excuse de n'avoir pu achever le payement de la terre de Thorens.

Annecy, 6 juin 1603.

Monsieur,

Je reviens naguere de Piemont, ou je vis Son Altesse et l'entretins quelque tems sur les affaires que Madame a de deça, et le treuvay fort disposé a luy donner toute assistence et faveur pour en chevir. Je luy proposay que, venant un agent de Madame, il seroit expedient de commander a quelques uns des officiers de la justice de terminer en une journee amiable toutes les difficultés qu'elle avoit, soit avec le seigneur Dom Amedeo , soit avec autres ; ce que Son Altesse accorda fort volontier, et monstra de priser extremement tout ce qui appartenoit au contentement de Madame, comme sa parente proche et vefve d'un prince son parent, et des louanges duquel il me dit merveilles.

Mais ce pendant que je traittoys ces choses en Piemont, la Chambre des Comptes acheminoyt le proces que Madame a avec le seigneur Dom Amedeo pour Conflens, si que, a mon arrivee, je le treuvay prest a juger ; et, selon l'advis du juge, j'escrivis tout aussi tost a Son Altesse pour avoir surseance et ordre que tout fut retardé, suivant l'accord qu'il m'avoit fait de terminer les differens sans proces. Mais tout cela pour neant, car ma lettre ne fut pas en chemin que l'arrest sortit tel que le juge vous escrira , ainsy quil m'a dit. J'en fus extremement marri pour m'estre treuvé court au service que j'avois desiré rendre a Madame.

Je treuvay en Piemont monsieur le referendaire Millet , et passay en Maurienne pour parler a Monsieur l'Evesque touchant Faverges ; ilz persistent, et s'offrent de solliciter, ayant procure de Madame, pour faire rendre les deniers sans que Madame en face la despence, suivant les memoires que je vous en laissay. Le marquis de Lulin escrivit a Madame pour acheter Doin, et j'envoyay la lettre ; je ne sçai si elle l'aura receüe : il attend response.

Reste que je parle de moy, qui suis tres marri de ne pouvoir si tost chevir du payement de Thorens (cf note 149 ) ; mais j'espere que Madame aura quelque consideration au malheur qui nous accable de deça et auquel Thorens mesme a une grande part. Je m'essayeray de la contenter au plus tost, n'ayant aucun affaire mondain en mon esprit que celluy-la, et de luy rendre tous les services quil me sera possible en toutes occurrences, comme tres-obligé que j'y suis. Faittes moy cet honneur, Monsieur, que de l'en asseurer et luy presenter une tres humble reverence en mon nom, ce pendant que je prieray Dieu quil vous comble de ses graces et que je suis,

Monsieur,

Vostre serviteur plus humble,

FRANÇs DE SALES,

Evesque de Geneve.

A Neci, 6 juin 1603. A Monsieur

Monsieur de la Porte,

Surintendant de la mayson de Madame la Duchesse de Mercœur.

Revu sur l'Autographe conservé au 1er Monastère de la Visitation de Paris.