Lettre CCCXLVII. À la Présidente Brulart

Les plus pures affections sujettes à la rouille. - Les vignes et les amitiés spirituelles: les unes et les autres ont besoin d'être émondées. - Le chemin de dévotion le plus assuré.

Annecy, 29 avril 1606. Madame ma tres chere Seur et Fille en Nostre Seigneur,

Voicy qu'en fin j'ay receu la lettre que vous m'escrivites le 28 decembre de l'an passé; et le pauvre La Pause , a qui ell'avoit esté remise, s'estant rompu une jambe aupres de Mascon, n'a peu me l'apporter plus tost. Avec icelle, j'ay receu l'advis que cette bonne fille que vous connoissés , m'a envoyé de ce petit accident qui luy estoit arrivé en l'amitié spirituelle de la personne a laquelle ell'avoit pris de la confiance ( M.Viardot ) ; et par ce que vous luy dires mieux ce que je desire qu'elle sache sur ce point, que je ne sçaurois luy escrire, je le vous diray.

Qu'elle ne s'estonne nullement de cet inconvenient ; car ce n'est qu'une crasse et rouilleure qui a accoustumé de s'engendrer au cœur humain sur les plus pures et sinceres affections, si on ne s'en prend garde. Ne voyt on pas que les vignes qui produisent le meilleur vin sont plus sujettes aux superfluités et ont plus de besoin d'estre emondees et retranchees ? Tell'est l'amitié, mesme spirituelle. Mais il y a cela de plus : c'est quil faut que la main du vigneron qui l'esmonde soit plus delicate, dautant que les superfluités qui surcroissent sont si minces et deliees que, en leur commencement, on ne sçauroit presque les voir, si on n'a les yeux bien essuiés et ouvertz. Ce n'est donq pas merveilles si on s'y trompe souvent. Mais cette fille doit benir Dieu que cet inconvenient luy ayt esté manifesté au commencement de sa devotion, car c'est un signe evident que sa divine Majesté la veut conduire par la main, et, par l'experience de ce danger eschappé, la veut rendre et sage et prudente pour en eviter plusieurs autres. 0 Dieu, que c'est chose rare de voir des feuz sans fumee ! Si est ce que le feu de l'amour cœleste n'en a point pendant quil demeure pur ; mais quand il se commence a mesler, il commence de mesme a rendre de la fumee d'inquietudes, de desreglemens et mouvemens de cœur irreguliers. Or bien, Dieu soit loüé que tout est bien remis et en bon estat.

Au demeurant, il ni a point eu de mal a se declairer en sorte que l'on aye peu reconnoistre la personne dont on parloit, puisqu'il ne se pouvoit faire autrement. Et le discret conseiller des ames ne treuve jamais rien d'estrange, mais reçoit tout avec charité, compatit a tout, et connoist bien que l'esprit de l'homme est sujet a la vanité

( Rm 8,20 ) et au desordre, si ce n'est par une speciale assistence de la Verité.

J'ay respondu a tout le reste de ce qu'elle m'escrivoit, par les precedentes que vous luy aures rendües. Il me reste a vous dire, ma tres chere Seur, que le chemin de devotion le plus asseuré, c'est celuy qui est au pied de [la] Croix : d'humilité, de simplicité, de douceur de cœur. Dieu soit a jamais en vostre cœur; je suis en luy et par luy, Madame,

Vostre tout dedié serviteur et frere,

F.

XXIX avril 1606. J'ay escrit a Madame du Puis d'Orbe, et maintenant je n'ay nul loysir.

A Madame

Madame la Presidente Brulart.

Revu sur l'Autographe conservé à la Visitation de Troyes .