Lettre CCCXXXVII. À M. Claude de Crépy
(INÉDITE)
Témoignages d'amitié. - Les Carmélites de Dijon et la bonne odeur qui émane de leur cloître. - Considération du Saint pour leurs Supérieurs. Retour à Annecy.
Chambéry, 2 avril 1606.
Monsieur mon tres honnoré Pere,
J'avois demeuré fort long tems sans avoir l'honneur de vos lettres, et tout en un jour, peu avant Pasques, j'en receu deux : l'une du 13 janvier, l'autre du 18 fevrier, par lesquelles, en un coup, j'ay receu aussi deux consolations ; car je fus asseuré de vostre santé, de laquelle j'avois esté en peyne a rayson d'un advis que j'avois eu que vous avies eu des ressentimens de vostre gravelle, et de celle de madame l'Abbesse, ma tres chere seur, a laquelle j'en souhaite beaucoup pour le desir qu'elle a de l'employer entierement a la gloire de Nostre Seigneur.
Vous seres consolé sans doute, Monsieur mon Pere, par le voysinage de ces bonnes Dames Carmelites, desquelles la bonne odeur se respand souefvement par tout ou elles sont receües ; et moy, qui participe a tous vos contentemens, je m'en res-jouis beaucoup, comme aussi de la conversation de messieurs de Berulle [et Gallemand], que j'honnore de tout mon cœur pour sçavoir que Dieu a le sien tourné du costé du leur.
Je receu les lettres de ma petite seur, vostre trop obligee servante, et les fis tenir ou elles s'addressoyent. Vous luy faites trop de grace de vous resouvenir d'elle si tendrement.
Je m'en revay a mon Annessy, puisque le Caresme est achevé , d'ou je vous escriray le plus souvent qu'il me sera possible pour vous tenir la memoire fraische de celuy qui, quoy que indigne et inutile, est glorieux d'estre et se pouvoir dire toute sa vie,
Monsieur mon Pere,
Vostre tres humble filz et serviteur,
FRANçs, E. de Geneve.
Ce 2 avril. A Monsieur
Monsieur de Crespy, President en la Cour du Parlement
de Dijon.
Revu sur une copie conservée à la Bibliothèque d'Angers (Catalogue des Mss., n° 1764, Anjou Topographie G-J)
Chapter 67 of 113