Lettre DCCLXXXI. À la Même

Beauté du Ciel après l'Ascension du Sauveur. - Aspirations pieuses. - La seule chose qui donne du prix à l'éternité des biens, d'après saint François de Sales. - La glorification du corps de Notre-Seigneur et de notre corps.

Annecy, [31 mai 1612 ]

Je vous donne .la joye dequoy nostre Sauveur est monté au Ciel, ou il vit et regne, et veut qu'un jour nous vivions et regnions avec luy. 0 quel triomphe au Ciel et quelle douceur en la terre ! Que nos cœurs soyent

ou est leur thresor ( Mt 6,21 ), et que nous vivions au Ciel, puis que nostre vie ( Col 3,4 ) est au Ciel.

Mon Dieu, ma Fille, que ce Ciel est beau, maintenant que le Sauveur y sert de soleil ( Is 60,19 ; Ap 21,23 ) et la poitrine d'iceluy, d'une source d'amour de laquelle les Bienheureux boivent a souhait ( Is ult. 11 ) ! Chacun se va regarder la dedans et y void son nom escrit d'un caractere d'amour, que le seul amour peut lire et que le seul amour a gravé ( Is 62,2 ; Ap 2,17 ). Ah Dieu ! ma chere Fille, les nostres y seront-ilz pas ?

Si seront, ,sans doute ; car bien que nostre cœur n'a pas l'amour, il a neanmoins le desir de l'amour et le commencement de l'amour. Et le sacré nom de Jesus n'est-il pas escrit en nos cœurs ? il m'est advis que rien ne le sçauroit effacer. Il faut donq esperer que le nostre sera escrit reciproquement en celuy de Dieu. Quel contentement quand nous verrons ces divins caracteres marqués de nostre bonheur eternel !

Pour moy, je n'ay rien sceu penser ce matin qu'en cette eternité de biens qui nous attend, mais en laquelle tout me sembleroit peu ou rien, si ce n'estoit cet amour invariable et tous-jours actuel de ce grand Dieu qui y regne tous-jours. Mon Dieu, ma chere Mere, que j'admire la contrarieté qui est en moy, d'avoir des sentimens si purs et des actions si impures ! car vrayement il m'est advis que le Paradis seroit emmi toutes les peynes d'enfer si l'amour de Dieu y pouvoit estre, et si le feu d'enfer estoit un feu d'amour, il me semble que ces tourmens seroyent desirables. Je voyois ce matin tous les contentemens celestes estre un vray rien aupres de ce regnant amour. Mays d'ou m'arrive-il que je n'ayme pas bien, puisque des maintenant je puis bien aymer ? 0 ma Fille, prions, travaillons, humilions-nous, invoquons cet amour sur nous.

Jamais la terre ne vit le jour de l'eternité sur son rond jusques a cette sainte feste, que Nostre Seigneur, glorifiant son cors, donna, comme je pense, envie aux Anges d'avoir de pareilz cors, a la beauté desquelz les cieux et le soleil ne sont pas comparables. Ah ! que nos cors sont heureux d'attendre un jour la participation a tant de gloire, pourveu qu'ilz servent bien a l'esprit en cette vie mortelle!

FRANÇs, E. de Geneve.