Lettre CMXVIII. À la Soeur de Bréchard, Religieuse de la Visitation

Un service de charité aimablement refusé. - Les " pauvres gens " servis comme frères et membres de Jésus-Christ, plus heureux que le " pauvre pere. " - Espérance qui consolait celui-ci de ne voir pas à son gré ses filles de la Visitation.

Annecy, [27 ou 28] septembre 1613 .

Vous me rendries certes trop aymable le mal de cette jambe, ma tres chere Fille bienaymee, si a l'occasion d'iceluy vous me venies voir et que vous me traittassies. Certes, j'aymerois bien ce mal qui, estant si petit, m'apporteroit tant de consolation ; je n'en voudrois vrayement jamais guerir a ce conte, non pas mesme quand ma Mere seroit venue et qu'elle vous auroit amenee avec elle.

Mays, ma tres chere Fille, comme vous sçaves, cela ne doit pas estre ainsy, car encor que l'innocence de ces cœurs de pere et de fille n'ayent pas besoin en leur candeur de tant de retenue, si est ce qu'il faut souffrir celle que l'aigreur des autres cœurs requiert, et que le pauvre pere, tout pauvre pere qu'il est, demeure sans estre visité par ses filles, voire par sa tres chere Mere, sinon qu'il ayt quelque mal qui puisse, par sa grandeur, meriter ce grand bien. Ma tres chere Mere et ma tres chere fille passeront modestement et non gueres loin du logis de ce pauvre pere et filz, sans y entrer et sans le voir, et iront tout droit servir ces pauvres gens qui ne leur sont vrayement ni filz ni pere, mais qu'elles regardent comme freres et membres de Jesus Christ. Ainsy, demeurés en paix, ma tres chere Fille, jusques a ce que demain, s'il se peut, je porte cette mauvaise jambe en vostre parloir ; car je ne nie point que les yeux de ma tres aymee Mere et l'ordonnance de ma tres bonne et brave fille ne luy soyent salutaires. Mais cependant, puisque vous ne pouves panser cette jambe, pensés un peu a ce cœur de vostre pauvre et chetif pere priés bien pour luy qui, reciproquement, vous souhaite mille et mille benedictions, Je salüe cherement nos Seurs, Monsieur Michel est bienheureux d'aller, quand il veut, voir mes filles . Un jour nous nous verrons tous ensemble en cette eternelle liberté de l'amour qui n'aura plus de bornes ni de fin, ni d'autres limites que celles de son immensité.

Revu sur le texte inséré dans la Vie manuscrite de la Mere de Bréchard par la Mère de Chaugy, conservée à la Visitation d'Annecy.