Lettre CMXIII. À Monseigneur Antoine de Revol Évêque de Dol

Un regret et une tentation du Saint. - Les serpents et le charmeur. -Comment Dieu récompensera" la sainte inutilité " apparente des missionnaires du bailliage de Gex.

Annecy, 12 septembre 1613.

Monsieur,

Je regrette que vous et monsieur de N. soyes a Paris pour un si fascheux exercice ; mais puisqu'il n'y a remede, il faut en adoucir la peyne par la patience ( Horat.Carmin. 1,25 ; Virgil. 19 ). Et moy je suis, Monsieur, en un continuel tracas que la varieté des affaires de ce diocese me produit incessamment, sans que j'aye un seul jour auquel je puisse voir mes pauvres livres, que j'ay tant aymés quelquefois et que je n'ose plus aymer maintenant, de crainte que le divorce auquel je suis tombé contre eux ne me fust plus aspre et ennuyeux.

Nous avons bien un petit quartier ou, despuis peu, on a restabli l'exercice de l'Eglise par l'authorité du Roy et selon l'edit de Nantes ; mais cet exercice me met plus en exercice de disputer contre les ministres pour les biens temporelz de l'Eglise qu'ilz nous retenoyent ( note 140 ), que de leur persuader, ni au peuple, la verité des biens spirituelz auxquelz ilz devroyent aspirer ; car c'est merveille comme ces serpens bouchent leurs oreilles pour n'ouyr point la voix du charmeur ( Ps 57,5 ), pour sagement et saintement qu'on les veuille charmer. Il y a la, nombre suffisant de fort bons pasteurs et de bons Peres Capucins qui, n'estans point ouys des hommes, sont veus de Dieu, lequel sans doute aggree bien leur sainte inutilité presente, laquelle il recompensera par apres d'une moisson plantureuse, et s'ilz sement en pleurs, ilz recueilleront en joie ( Ps 135,5 ).

C'est bien asses, Monsieur, vous avoir entretenu pour ce renouvellement de nostre commerce, que je veux, Dieu aydant, continuer, et ne point cesser de vous ramentevoir souvent que je suis invariablement,

Monsieur,

Vostre tres humble et tres obeissant, indigne frere et serviteur inutile,

FRANçs, E. de Geneve.

De Neci, ce 12 septembre 1613.