Lettre CMXXVI. Au Comte Prosper-Marc de Tournon

Bienveillante courtoisie dn comte de Tournon pour le Saint et pour ses frères. - Gratitude de François de Sales. - Nouvelles diverses. - Un écrivain fertile.

Annecy, 4 novembre 1613.

Monsieur,

J'estois a Belley quand M. de Blonnay passa en cette ville , et a mon retour je treuvay la lettre quil vous pleut m'escrire le 18 du moys passé, par laquelle vous me renvoyes au recit quil me fera pour certaines particularités, en l'ignorance desquelles je demeureray jusques a son retour de Chablaix, mais avec bonne patience, puisque ce que je dois desirer le plus de sçavoir m'est si amplement tesmoigné par vostre escrit : c'est que vous vives en santé, et moy en vostre bienveuillance, laquelle mesme s'estend a faire des pensees si honnorables pour mes freres, comme est celle que vous me signifies, quoy que couvertement, et que ledit sieur de Blonnay a plus ouvertement fait entendre a mon frere de Thorens , quil gratifia de sa visite en son passage.

Monsieur, que vous puis-je dire sur cela ? sinon que, puisque le bon genie de vostre naturel vous pousse a nous aymer tant sans merite, je le prie de continuer. Et bien que l'insuffisance et la petite mediocrité des moyens de mes freres leur empesche la reception du bien et de lhonneur que vous leur desires, si est ce que la proposition seule ne leur peut estre que fort desirable, car elle donnera, pour le moins, quelque commencement de bonn'impression d'eux au Prince ; et eux, donques, et moy vous sommes extremement obligés, Monsieur, par cette nouvelle obligation qui nous rend tous-jours plus vos serviteurs.

Au demeurant, quoy que cette nouvelle legation que Son Altesse vous impose ayt beaucoup de charges, ell'a aussi beaucoup d'honneurs ; entre lesquelz celuy la, d'estre envoyé comme reparateur des desordres et manquemens qui sont survenus en son service, me semble fort grand et digne qu'il vous soit deferé. Allés donq, Monsieur, en bon voyage, et revenés bien tost, avec le contentement que Son Altesse mesme espere de vostre travail et industrie en un tant important service.

Nous avons icy le bon M. le President de Buttet extremement malade, de la vie duquel les medecins sont encor entre la crainte et l'esperance . Presque tous les gens de bien en sont en peyne et tesmoignent combien ilz l'estimoyent.

Il ne se peut dire combien Monsieur l'Evesque de Belley fait estat de vostre amitié, ainsy quil m'a souvent repeté pendant dix jours entiers que j'ay esté avec luy. Il escrit tous-jours incessamment, et blasme tous-jours ce quil a ci devant escrit.

Nous avons eu M. le Marquis de Lans, qui revient demain de La Roche icy.

Ce sont toutes. nos nouvelles, au moins les miennes, de moy, qui vis hors des affaires et du commerce de ceux qui les manient. Et en attendant des vostres par madame ma cousine , comme vous me faites esperer, je prie Dieu quil vous accompaigne tous deux et comble de benedictions, et suis,

Monsieur,

Vostre tres humble serviteur,

FRANçs, E. de Geneve.

4 novembre 1613, a Neci.

A Monsieur

Monsieur le Comte de Tornon, etc.

Revu sur l'Autographe appartenant à Mme la marquise Pensa, à Turin.