Lettre MXXI. Au Duc de Savoie, Charles-Emmanuel 1er

Avis donné au Duc sur la politique du gouverneur de Milan en Valais. Eloge détaillé du nouvel Evêque de Sion. - Un présent qu'il n'a pas reçu.

Thonon, 13 décembre 1614.

Monseigneur,

Ayant esté ces sept ou huit jours passés en Valey pour la consecration de Monseigneur de Syon, j'ay remarqué beaucoup de bonn 'affection au service de Vostre Altesse Serenissime en plusieurs de ce païs-la. Mays parmi cela, j'ay apperçeu que le seigneur gouverneur de Milan a des grandes prattiques pour attirer cet Estat au parti d'Espagne, et a presque des-ja gaigné pour cet effect les vœux et les voix des quattre dizains, qu'ilz appellent, d'en haut : Rarogne, Vespia, Brighen et Comze, qui auroyent des-ja fait passer leur inclination en resolution, si Monseigneur de Sion et les trois dizains d'embas, Sion, Sierre et Loeïtze, ne se fussent grandement opposés pour empescher ce coup ( note 693 ), lequel toutefois il sera malaysé de destourner, si quelqu'un n'arrive promptement entr'eux de la part de Vostre Altesse, avec les provisions requises pour reasseurer ces espritz-la fort esbranslés.

Et par ce, Monseigneur, que le Valley estant si proche de Savoye et Piemont, ne peut estre qu'extremement utile aux affaires de Vostre Altesse, quand ell'en aura l'alliance et correspondance, j'ay pensé que cet advis estoit d'importance et que je le devois donner a Vostre Altesse, laquelle je supplie tres humblement de l'avoir aggreable, comm'encor que je luy die que ce jeune Prelat que nous venons de sacrer est de fort bonne esperance, devot, actif, de bon esprit et plus gentil que sa nation n'a pas accoustumé d'en produire, fort affectionné a Vostre Altesse, et qui attendoit avec honneur un anneau episcopal en present, de Monseigneur le Prince Cardinal , ainsy qu'on luy avoit fait esperer.

Et quant au cappitaine Valdin , il fait par dessus tous profession expresse d'estre tout affecté au service de Vostre Altesse, a laquelle je fay tres humblement la reverence, et luy souhaitant- toute sainte prosperité, je demeure infiniment,

Monseigneur,

Son tres humble, tres obeissant et tres fidele

serviteur et orateur,

FRANÇs, E. de Geneve.

A Thonon, le XIII decembre 1614.

Revu sur l"Autographe conservé à Turin, Archives de l'Etat.