Lettre MLIII. À M. Guillaume de Bernard de Foras

Pourquoi François de Sales s'affligeait de la calomnie faite contre ses frères.- Une prédiction du saint Evêque.

Annecy, 9 mars 1615.

Estant de retour de Sales, ou j'estois allé passer les jours de carnaval, j'ay treuvé le retour de nos des-ja trop vielles tribulations , par la calomnie faite contre mes freres. Je me joüerois de tout cela, si ce n'estoit que je voy Monseigneur en cholere et indignation. Cela m'est insupportable, a moy qui ay tant d'inviolables affections a ce Prince, et duquel j'ay si doucement autrefois savouré la bonté. Tant de gens faillent, tuent, assassinent; tous ont leur refuge a cette clemence : mes freres ne mordent ni ne ruent, et ilz sont accablés de sa rigueur.

Quel mal leur fait-on, ni a vous, disent les meschans ? On nous ravit le bien le plus pretieux que nous ayons, qui est la bonne grace de nos Princes, et puis on dit : Quel mal vous fait-on ? Mon tres cher Frere, est il possible que Sa Grandeur m'ayme, qui, ce semble, prend playsir aux rapportz qu'on luy fait de mes freres, puisqu'il a des-ja treuvé que c'estoit ordinairement des impostures, et neanmoins il les reçoit, il les croit, il fait des demonstrations de tres particuliere indignation ?

C'est crime par tout le monde de haïr le prochain ; icy, c'est crime de l'aymer. Messieurs les Collateraux , gens hors de reproche, sont reprochés par authorité extraordinaire, seulement parce qu'ilz m'ayment de l'amour qui est deu a tous ceux de ma sorte. Certes, mon cher Frere, j'ay de la gloire d'estre aymé par vous et d'estre passionné pour vous ; mais puisque mon malheur est si grand, pour Dieu, ne disons plus mot des-ormais. Dieu et nos cœurs le sçachent seulement, et quelques uns dignes d'un secret d'amour.

Je vous envoye un double de la lettre que j'escris a Monseigneur ( lettre 1052 ). Voyés si elle devra ou pourra estre donnee ; car, tout extremement passionné que je suis en cette occasion, je ne voudrois pas que Monseigneur se faschast, car en somme, je ne veux plus que vous couries fortune d'estre disgracié. Un jour viendra que de m'aymer ne sera plus reproche a personne, comme personne de ceux qui m'ayment particulierement ne merita jamais reproche.

……………………………………………………………………