Lettre MLXIV. À Monseigneur Pierre Fenouillet Eveque de Montpellier

(INÉDITB)

Entremise du Saint pour faire rentrer en grâce auprès du destinataire un parent qui l'avait offensé. - Remerciements pour l'offrande d'un opuscule. - Portrait du jeune Louis des Hayes. - Eloge des Pères Barnabites.

Annecy, 12 avril 1615.

Monseigneur,

Je sçai combien est juste le ressentiment d'indignation que vous aves eu contre le sieur de Barraux , et le cœur m'en a fait grand mal, ne m'estant peu tenir de luy en faire la correction et tesmoigner que j'avois part au desplaysir quil vous avoit donné, dautant plus que je m'estois res-joui dequoy il avoit espousé une damoyselle qui est ma parente , sur lhonneur quil a d'estre le vostre si proche. Or, le voyci maintenant, Monseigneur, quil prend cette sayson de repentance et d'absolution a son advantage , et me demande mon entremise pour vous annoncer son regret de vous avoir tant ennuyé, et vous supplier de le recevoir en grace. Tout, comme je pense, favorisera son desir : le tems escoulé, qui luy a donné le loysir de se bien repentir ; le tems qui coule, auquel on ne refuse guere le pardon, mesme aux plus perfides ennemis ; le bon advocat qu'il employe et avec lequel il va recourir a vostre bonté Que si j'osois, j'adjousterois encor mon intercession, que vostre extreme bienveuillance envers moy rend hardie et forte ,

et en fin, la sousmission quil fait, ne desirant sa reconciliation aupres de vous que pour accoyser les remors quil a de vous avoir desagreé, et recouvrer lhonneur le plus pretieux quil ayt en ce monde, qui est d'estre advoüé de vous vostre tres humble serviteur.

Vous feres donq, je m'asseure, encor ce coup selon vostre bonté, laquelle je remercie tres humblement de la faveur quil vous pleut me faire, passant a Lion , m'ayant fait part de la belle Remonstrance contre les duelz , que je prie Dieu vous rendre autant efficace comme les merites de la cause et de celuy qui l'a playdee le requierent.

Nostre jeune M. des Hayes est icy tout apprivoysé avec le college . Il est fort gentil, l'esprit vif et qui ayme tendrement la sainte liberté quil a apprise parmi les pages ; mais on tasche de luy en faire gouster un'autre un peu plus sainte et, petit a petit, on y proffite parce quil est bon enfant. Et comme pourroit il autrement, estant filz de tels pere et mere ? Certes , nos bons Barnabites sont braves gens, doux plus qu'on ne sçauroit dire, condescendans, humbles et gracieux outre la mesure ordinaire de leur païs.

Vous sçaures toutes nouvelles a l'abord de monsieur Portier , et vous sçaves que nous sommes icy hors de commerce. Je suis sans fin,

Monseigneur,

Vostre tres humble et tres obeissant frere et serviteur,

FRANÇs, E. de Geneve.

12 avril 1615.

A Monseigneur

Monseigneur le Rme Evesque de Monpelier.

Revu sur l'Autographe conservé à la Visitation de Montpellier.