Lettre MLXV. À la Mère de Chantal, a Lyon
L'affaire de Mme des Gouffiers. - Ne pas recevoir les postulantes avant l'age requis. - Pourquoi la Mère de Chantal pouvait répondre hardiment pour le Saint. - Avis sur les sorties extraordinaires. - Trois hôtesses du Monastère d'Annecy. - Un sermon de deux heures et demie.
Annecy, 18 avril 1615.
Pensés comme je vous escris, ma tres chere Mere. Hier, jour de la mort de nostre Vie , au retour des Tenebres, je treuvay vos lettres ; ce matin, jour de la sepulture, tout en allant faire les Ordres pour sept a huit personnes de qualité , en nostre chappelle de la Visitation.
Pour ma tres chere Seur Marie Jeanne Elizabeth , je ne desappreuve pas son voyage, ni ne l'appreuve ; mais il seroit utile que je commette quelqu'un pour ouyr les tesmoins et recevoir authentiquement leurs depositions, et non seulement les tesmoins, mays Madame du Paraclet et ses Religieuses. Or, il faut que je face cela avec conseil et beaucoup de soin. Ce pendant, nous penserons s'il sera expedient qu'elle mesme y aille ; il faut en tenir secrette la deliberation.
Si Monseigneur l'Archevesque veut, on pourra bien dispenser pour l'aage en la reception de ces damoyselles , en la contemplation des meres, qui pourront tenir place d'une partie de la resolution que l'aage ne permet pas aux filles. En somme, il faudra fort condescendre aux volontés de Monseigneur l'Archevesque, pourveu que l'on treuve moyen d'eviter la consequence ; car c'est une regle tres salutaire que celle la, de ne recevoir point avant l'aage competent, pour oster toute excuse au repentir, s'il en venoit .
Toutes ces ames seront bonnes, si elles sont courageuses, et Mme Colin et tout. Mays, pour me charger de soin quelcomque d'affaires, helas ! vous sçaves comme moy mesme quel homme je suis pour cela : c'est a dire, que je ne suis pas homme pour cela. Vous pouves tous-jours respondre pour moy sans scrupule, car il se treuvera tous-jours que ce sera moy qui auray respondu. Vous estes, et d'esprit, et de volonté, et de tout, une mesme chose avec moy; vous sçaves ce que je puis, que je veux et que je souhaitte. Ne me renvoyés donq rien, mais respondes hardiment.
On peut faire venir les damoyselles des Capucins pour essayer, et estant treuvees propres, ne les point renvoyer ; car il n'y a pas grand hazard de les tenir en leur ha bit .
Monseigneur l'Archevesque venant, humiliés vous fort cordialement pour moy comme moy mesme, et l'asseurés fort de l'estime, amour et reverence que j'ay a sa personne. Prenés garde a retenir la liberté des sorties extraor dinaires : entre lesquelles, les Jubilés, la visite des proches malades, ouy mesme de quelques signalés bienfacteurs ou grand amy de la Mayson, et mesme de quelque sermon, comme celuy de la Passion, doivent, ce me semble, estre reservees, et toutes autres occasions esquelles la Communauté des Seurs, avec l'advis du Pere spirituel, treuveront que ce seroit a propos ( note 830 ) ; car il faut reduire la prattique des sorties a la seule bienseance et modestie que la Religion, jointe a la condition du sujet, requiert, car ainsy en fait on es Congregations d'Italie .
Helas, ma chere Mere, il faut que je finisse. Nos Seurs ne sçavent pas que j'escris, car c'est par la voye de Chamberi. Elles ont madame de Chasteaufort , madame la Baronne de Chastelard et madame de la Flechere, la vefve ; troys bonnes et braves hostesses, dont la premiere parle fort de revenir un jour du tout, et l'autre est mariee, mais une perle. Son mary est filz du Baron de la Serraz ; fille de madame Mont Saint Jean .
Hier, je fis le sermon de la Passion en deux heures et demie; nos hommes disent que c'est chose extraordinaire.
Ma tres chere Mere, j'ay tant prié Dieu pour vous, et le feray encor ; tout m'annonce le bien de nostre indivisible unité. 0 Seigneur Jesus, vivés a jamais, regnés et a jamais soyes beni dans nostre unique cœur. Amen.
FRANÇs, E. de Geneve.
A Madame de Chantal,
Superieure de la Visitation.
A Lion.
Chapter 189 of 209