Lettre MCCXXXVI. À la Mère de Bréchard Supérieure de la Visitation de Moulins

Les débuts de la fondation du monastère de Moulins. - Quels sont les signes de la bonté d'une œuvre. - La tentation des " anges terrestres. " - Encouragements à la générosité et à la confiance .

Annecy, 19 septembre 1616 .

Je n'ay receu aucune de vos lettres, ma tres chere Fille, despuis vostre depart ; cela, je vous prie, que veut il dire ? Or, je sçai bien neanmoins que vostre charité est invariable.

Mays j'apprens par lettres venues de Lyon, que vous estes malade, et un peu mesme estonnee de n'avoir pas treuvé les choses en si bons termes comme nostre desir nous le faysoit imaginer . Voyla, ma tres chere Fille, des vrays signes de la bonté de l'œuvre : l'acces y est tous-jours difficile, le progres un peu moins, et la fin bienheureuse. Ne perdes point courage, car Dieu ne perdra jamais le soin de vostre cœur et de vostre trouppe, tandis que vous vous confieres en luy. La porte des consolations est malaysee ; la suite sert de recompense. Ne vous degoustes point, ma chere Fille, et ne laisses point affoiblir vostre esprit entre les contradictions. Quand fut ce que le service de Dieu en fut exempt, sur tout en sa naissance?

Mais il faut que je vous die naïfvement ce que je crains plus que tout en cette occurrence : c'est la tentation des aversions et repugnances entre vous et nostre [Sœur des Gouffiers ], car c'est la tentation qui arrive ordinairement es affaires qui dependent de la correspondance de deux personnes ; c'est la tentation des anges terrestres, puisqu'elle est arrivee entre les plus grans Saintz, et c'est nostre imbecillité, de tous tant que nous sommes enfans d'Adam, qui nous ruine, si la charité ne nous en delivre. Quand je voy deux Apostres se separer l'un de l'autre pour n'estre pas d'accord au choix d'un troisiesme compaignon ( Ac 15,37 ), je treuve bien supportables ces petites repugnances, pourveu qu'elles ne gastent rien, comme cette separation-la qui ne troubla point la mission apostolique. Si quelque chose de tel arrivoit entre vous deux, qui estes filles, cela ne serait pas estrange, pourveu qu'il ne durast pas. Mays neanmoins, ma tres chere Fille, rehausses vostre esprit, et voyes que vostre action est de grande consequence. Souffrés, ne despités point, adoucisses tout, regardes que c'est la besoigne de Dieu a laquelle cette dame s'employe selon son sentiment, et vous selon le vostre, et que toutes deux vous deves entreporter et entre- supporter pour l'amour du Sauveur. Deux ou trois annees se passent bien tost, et l'eternité demeure.

Vostre maladie corporelle sert de surcharge, mais l'assistance promise aux affligés ( Mt 11,28 ) vous doit grandement fortifier. En somme, gardes vous bien des descouragemens. Croyes-moy, il faut semer en travail, en perplexité, en angoisse, pour recueillir en joye ( Ps 125,5 ), en consolation, en bonheur, et la sainte confiance en Dieu adoucit tout, impetre tout et establit tout.

Je suis tout vostre, certes, ma tres chere Fille, et je ne cesse point de prier Dieu qu'il vous face sainte, forte, constante et parfaite en son service. Je salue tres cordialement nos cheres Seurs , et les conjure de prier Dieu pour mon ame, inseparable de la vostre et des leurs en la dilection qui est selon Jesus, nostre Sauveur ( Ep 5,2 ).

FRANÇs, E. de Geneve.